Кыайыыны уруйдуур хоһооннор

Быйыл 2025 сылга Улуу Кыайыы 80 сылын бэлиэтиибит. 80 сыл анараа өттүгэр киһи-аймах сайдыытын историятыгар хаһан да буолбатах элбэх хаан тохтуулаах, алдьатыылаах-кээһэтиилээх сэрии буолбута.

Мэҥэ Хаҥалас 2 Наахара нэһилиэгиттэн уопсайа 158 киһи сэриигэ барбыта, олортон 58 киһи сэрии толоонугар охтубута, 14 киһи сураҕа суох сүппүтэ, 84 киһи дойдуларыгар кыайыы көтөллөнөн эргиллэн кэлбиттэрэ.

Биһиги улууспутуттан, нэһилиэкпититтэн элбэх киһи 20-с кондепоҕа сулууспалаабыттара. Монголияттан, Бурятияттан дьиикэй аҥардаах сылгылары көрөн-харайан айааһааннар элбэх сылгыны фроҥҥа атаарбыттарын билэбит.

Кулун тутар 20 күнүгэр Мэҥэ-Хаҥалас улууһун 2-с Наахара нэһилиэгэр Арассыыйаҕа Аҕа дойдуну, Сахабыт сиригэр Ийэ додуну көмүскээччи сылларынан уонна Сылгыһыт күнүн иитинэн сэрии, үлэ бэтэрээнэ, К.К.Байкалов аатынан сопхуос лауреат сылгыһыта Никаноров Дмитрий Антонович аатынан X төгүлүн “Кыайыыны уруйдуур хоһооннор” диэн уус-уран ааҕыы күрэҕэ буолла.

Күрэххэ 4-8 кылаас үөрэнээччилэрэ кытыннылар. Түмүккэ I миэстэни Исай Никаноров (4 кыл.) К.Ларионова “Эһээбэр” диэн хоһоонунан,  II миэстэни — Павлик Семенов (5 кыл. ) Е.Прокопьева “Никаноров Д.А. Анабыл” хоһоонунан, III миэстэни — Чыамайыкыттан Игнат Романов (4 кыл.) Куонаан Лирскэй “Саллаат суруга” диэн хоһооннорунан кыайыылаах аатын ыллылар. Куонкуруспут “Кылаан чыпчаал” бирииһин Люба Соловьева (6 кыл.) Е.Прокопьева “Атаарбыта сайылыга” диэн хоһоонунан муҥутуур кыайыылаах үрдүк аатын сүктэ. Кыайыылаахтарга Никаноров Д.А. оҕолоро, сиэннэрэ, хос сиэннэрэ харчынан бириэмийэни олохтоотулар. Ол курдук I миэстэҕэ — 5000 солк., II миэстэҕэ — 3000 солк., III  миэстэҕэ — 2000 солк. уонна муҥутуур кыайыылаахха 10000 солк. харчынан туттардылар. Күрэхпитигэр сылын аайы суолта ууран кыттар дьоммутугар махтанабыт уонна салгыы тохтоон хаалбакка, талааннарын өссө сайыннаран, дьарыктанан элбэх куонкурустарга кыттыахтара диэн эрэнэбит.

Сэбиэскэй норуот Аҕа дойдуну көмүскүүр Улуу сэриигэ ситиспит улууканнаах кыайыытын суолтата үйэлэргэ өлбөөдүйүө суоҕа. Хас үүнэр көлүөнэ ахсын Ийэ дойдуга муҥура суох таптал, бэриниилээх буолуу, хорсун быһыы үтүөкэннээх чаҕылхай холобурун быһыытынан сыаналаныа, ахтылла туруоҕа.

Ким да умнуллубат! Туох да умнуллубат!

Ирина Никанорова, Мэҥэ Хаҥалас, 2 Наахара нэһилиэгэ

Хаартыскалары: И.Никанорова ыытта