Кыбартыыра иһигэр тыҥырахтаах көтөр киирбит

Ньурба олохтооҕун кыбартыыратын иһигэр мэкчиргэ киирбит. Сиэмэх көтөрү тутарга дьахтар быыһааччылартан көмө көрдөспүт.

Дьахтар эрдэ сарсыарда биэс чааска дьикти тыастан-уустан уһуктубут. Паарка аттыгар олорор буоланнар, мэкчиргэ кыбартыыра иһигэр көтөн киирбит. Онуоха дьиэ хаһаайката этэринэн, көтөр хайдах да дьиэҕэ көтөн киирэр кыаҕа суох эбит — түннүктэр бары сиэккэлээхтэр, онтон бордууһуна сабыылаах турбут. Куттаммыт дьахтар тыҥырахтаах көтөрү бэйэтэ тута сатаабыт да кыаллыбатах, онон быыһааччылартан көмө көрдөһөргө быһаарыммыт.

«Дьахтар бары ньыманы боруобалаабыт, ардыгар көтөрү суорҕанынан кытта саба быраҕа сатаабыт. Дьиэҕэ кыра оҕо баарын үрдүнэн, көтөр кими да эчэппэтэх. Быыһааччылар көтөрү тутатына туппуттар уонна көҥүлгэ таһааран ыыппыттар», — диэн Саха сиринээҕи Быыһыыр сулууспатын көрдүүр-быыһыыр этэрээтин начаалынньыга Афанасий Ноев СИА-ҕа иһитиннэрдэ.

Быыһааччылар кыыллары быыһыыр түгэннэрэ элбэх. Үксүн олохтоохтор дьиэ кыылларын, сүөһүнү, сылгыны быыһыырга наадыйан эрийэллэр. Исписэлиистэр мас үрдүгэр ыттыбыт куоскалары түһэрэллэр, дириҥ омуһахха уонна ойбоҥҥо түспүт сүөһүнү да, сылгыны да таһаараллар.