Кыбартыыраҕа дьиэ кыылын иитэргэ ахсаанын хааччахтыахтара

Госдуумаҕа кыбартыыраҕа иитиллэр ыттар уонна куоскалар ахсааннарын хааччахтыыр туһунан сокуон барылын киллэрдилэр. Докумуон алтынньы 10 күнүгэр балаата электроннай баазатыгар таҕыста.

Бу туһунан «Парламентская газета» иһитиннэрэр. Көҕүлээһини Госдуумаҕа Дьиэ кэргэни харыстыыр, аҕа, ийэ буолуу уонна оҕо саас боппуруостарыгар кэмитиэтин чилиэнэ Евгений Марченко оҥордо.

Сокуон барылынан маннык нуорманы олохтуурга этиллэр — биир улахан ыкка эбэтэр биир улахан куоскаҕа олорор дьиэ уопсай иэниттэн 18 квадратнай миэтэрэ ирдэниэхтээх. Оҕолоро төрөөтөхтөрүнэ, алта ыйдарын туолуор диэри бу нуорманы куоһарар көҥүллэнэрэ көрүллэр. Ону таһынан, хааччахтааһын сирдьит ыттарга тарҕаныа суоҕа диэн этиллэр.

Сокуон барылыгар быһаарыы сурукка бэлиэтэнэринэн, билиҥҥи нуормалар олорор дьиэҕэ муҥура суох ахсааннаах дьиэ кыылын иитэри көҥүллүүллэр. Ол түмүгэр көннөрү кыбартыыраларга 15-20-тэн тахса куоска эбэтэр ыт иитиллэр түбэлтэлэрэ үгүстүк көстөр, бу санитарнай-эпидемиологическай ирдэбиллэри кэһиигэ уонна антисанитарнай усулуобуйаны үөскэтиигэ тириэрдэр.