Кыбартыыратыгар арыгыһыттары мунньубут

Дьокуускай куорат Бабушкин уулуссатыгар баар элбэх кыбартыыралаах дьиэ олохтоохторо ИДьМ 3-с №-дээх полиция салаатын дьуһуурунай чааһыгар үҥсүү түһэрбиттэр. Кинилэри кытта ыаллыы кыбартыыраҕа олорор киһи дьиэтигэр араас дьону мунньан арыгылыыр, айдаарар эбит.

Полиция участковайа быраабы кэһэр 32 cаастаах киһини туппут. Эр киһи урукку өттүгэр күлүгээннээһиҥҥэ түбэһэн, административнай эппиэтинэскэ хаста да тардылла сылдьыбыт. Полиция үлэһиттэрэ хаста даҕаны сэрэтэр бэсиэдэлэри ыыта сылдьыбыттар.

Бу дьыаланан административнай боротокуол толоруллубутун туһунан ИДьМ пресс-сулууспата иһитиннэрэр.