Күбүрүнээтэрдэр ыраах дистанцияҕа ытыыга күрэхтэстилэр

Бэҕэһээ, алтынньы 6 күнүгэр, ыраах дистанцияҕа ытыыга үһүс Бүтүн Арассыыйатааҕы турнир чэрчитинэн «Сулус» полигоҥҥа  Уһук Илиҥҥи федеральнай уокурукка Бэрэсидьиэн боломуочуйалаах бэрэстэбиитэлин Сэбиэтин чилиэннэрэ, ол иһигэр УИФУо күбүрүнээтэрдэрэ кыттыылаах байыаннай-полевой сэминээр буолла.

Эрэгийиэннэр баһылыктара полигоны тас эрэ өттүттэн сыаналаабакка, ыраах дистанцияҕа ытыы тиэхиньикэтин тугун-ханныгын, бойобуой балаһыанньаҕа үлэ хайдах барарын биллиннэр диэн  диэн Арассыыйа бойобуой снайпинын Федерациятын салайааччы Арассыыйа Дьоруойа, подполковник Ярослав Якубов бронежилеттары кэтэн баран, бэйэҕит ытыҥ диэн этии киллэрбитэ. Бу этиини РФ Бырабыыталыстыбатын бэрэссэдээтэлин солбуйааччы — УИФУо РФ Бэрэсидьиэнин боломуочуйалаах бэрэстэбиитэлэ Юрий Трутнев тута өйөөбүтэ: “Арассыыйа бэйэтин тутулуга суох буолуутун туһугар охсуһар кэмигэр хас биирдиибит сааны-саадаҕы тутан Ийэ дойдубутун көмүскүүргэ бэлэм буолуохтаахпыт”.

Бу күн полигоҥҥа ыраас чаҕылхай күннээх күн турбута. Ол эрээри тыал араастаан эрийэр буолан, балаһыанньаны уларыта турара. Маннык турнирга тыал баара хайаан да наада эбит, оччоҕо эрэ толкуйуҥ күүһүрэр, уопутуҥ эбиллэр. Баһылыктар бастаан 600 м дистанцияҕа бастакы квалификацияны ааһар ытыыны оҥорбуттара. Биллэн турар, күрэхтэһии аата күрэхтэһии, ким эрэ ааһар, ким эрэ тохтуур.

Күбүрүнээтэрдэр ытыыга күрэхтэһиилэригэр биһиги Ил Дархаммыт Айсен Николаев эмиэ бэйэтин тургутан көрбүтэ. Итиэннэ ситиһиилээхтик квалификацияны ааспыта.

“Уһук Илин эрэгийиэннэрин баһылыктара, полпредство, Уһук Илин, Арктика министиэристибэтин салалтата кыттыылаах бу бастакы күрэхтэһии буолан эппиэтинэстээх, долгутуулаах. Бу бары байыаннай дьайыыга быһаччы кыттыһар, Кыайыы туһугар олус элбэҕи үлэлиир дьоннор. Оттон ыраах дистанцияҕа ытыы туһунан эттэххэ, үгүстэр 100, 200, 500 м ыраахха ыппыт дьоннор. Онон маннык ыраах дистанцияҕа аан бастакытын боруобаланаллар. Биһиги полигоммут тыаллааҕын бары бэлиэтииллэр, араастаан буруйа турар буолан, биэс мүнүүтэ иһигэр хайысхатын уларыта охсон кэбиһэр”.

Алексей Чекунков, Уһук Илини, Арктиканы сайыннарыыга миниистирэ:

“Саха сирэ номоххо киирбит снайпердара элбэҕинэн биллэр. Онон манна полигон бастакынан аһыллыбыта түбэһиэхчэ буолбатах. Тоҕо маннык күрэхтэһиини күбүрүнээтэрдэргэ ыыттыбыт диэтэххэ, хас биирдии судаарыстыбаннай сулууспалаах бойобуой кирбиигэ сылдьар уолаттардыын биир санаалаах буолуохтаах. Биһигиттэн үгүспүт байыаннай дьайыы зонатыгар сылдьыбыттара, ыкса сибээһи тута сылдьаллар. Биһиги Арассыыйа, Уһук Илин хас биирдии уол оҕото эр киһилии, бастатан туран, Ийэ дойдутун көмүскээччи буоларын быһыытынан иитэн таһаарыахтаахпыт.

Күрэхтэһээччилэр бары биир санаалаахпыт, күрэстэһии да суох, партнердарбыт. Инники кирбиигэ сылдьар уолаттарбыт хайдах-туох быһыыга-майгыга сылдьалларын билиэхтээхпит. Полигон бэртээхэй, Салгыы Хабаровскай кыраайга, Приморьеҕа, Магадаҥҥа, атын да эрэгийиэннэр аһыллан иһиэхтэрэ”.

Алексей Михайлович аармыйаҕа сылдьыбатаҕым, ол да буоллар манна кэлиэм иннинэ ытарга эрчиллибитим диэн билиннэ. Манна даҕатан эттэххэ, кини тута сыалын табан, квалификацияны ааспыта.

Квалификацияны ааспыттар салгыы ханнык дистанцияҕа ыталларын бэйэлэрэ талаллар.

Күрэхтэһии түмүгүнэн бастыҥ түмүгү Илиҥҥи байыаннай уокурук сэрииһиттэрин хамандалааччы э.т., генерал-лейтенант Михаил Носулев 1500 миэтир ыраахтан сыалын табан кыайыылааҕынан таҕыста.

“Михаил Яковлевич биэс сэрии бэтэрээнэ, кадровай байыаннай, илиҥҥи байыаннай уокурук салайааччыларыттан биирдэстэрэ. Улаханнык ытыктыыр киһим, наҕарааданы ылыан ылла. Бирииһи астынан туран туттарабын”, — диэн Юрий Трутнев эттэ. Кини бэйэтэ эмиэ ити ыраахха иккитэ сыалын таппыт гынан баран, зачеты таһынан ыппытым, диэтэ.

Иккис миэстэни бары соһуйуохпут иһин Еврейскэй автономнай уокурук күбүрүнээтэрэ Мария Костюк ылла.

Кини 1300 м дистанцияҕа сыалы таппыт. Үһүс миэстэҕэ 1200 ыраахха ыппыт Чукотка автономнай уокуругун күбүрүнээтэрэ Владислав Кузнецов таҕыста.

“Мария Федоровна туһугар долгуйбутум, бинтиэпкэни илиитигэр ылыа да суоҕа дии санаабытым. Ону баара бэртээхэй түмүгү ситистэ. Олус уустук полигон буоларын уруккуттан истэбин. Уһук Илиҥҥи федеральнай уокурук күбүрүнээтэрдэрэ бэйэлэрин дьоһуннук көрдөрдүлэр. Кинилэр байыастарга көмөлөһөллөр, тиэхиньикэнэн, сэрии сэбинэн хааччыйаллар, босхоломмут сирдэри чөлүгэр түһэрэллэр. Наада буоллаҕына, сааны-саадаҕы илиилэригэр ыларга бэлэм дьон буолалларын көрдөрдүлэр”, — диэн тоһоҕолоон бэлиэтээтэ Юрий Трутнев.

Кыайыылаахтары наҕараадалыырыгар Юрий Трутнев бу куубактарга үс Арассыыйа Дьоруойа илии баттаабыттара, онон ураты наҕараада буолар диэтэ.

Күрэхтэһии Юрий Трутнев сорудаҕынан, «ВОИН» Киин курсааннара ылбыт билиилэрин дьыалаҕа чиҥэтэр уонна бэлэмнээһин систиэмэтин тупсарар сыалтан, СӨ Бырабыыталыстыбатын уонна Арассыыйа бойобуой снайпинын Федерациятын өйөбүлүнэн, «ВОИН» киининэн тэрилиннэ.