Күчүс көмүстээх сири баһылааһыҥҥа 1500 киһи үлэнэн хааччыллыа

Ил Дархан Айсен Николаев дойду Бэрэсидьиэнин кытары сирэй көрсөн кэпсэтэригэр өрөспүүбүлүкэҕэ бырамыысыланнас сайдыытын уонна бөдөҥ инвестиционнай бырайыактар тустарынан кэпсээбитэ.

Онно «Селигдар» хампаанньа Күчүс көмүстээх сири баһылааһына курдук бөдөҥ бырайыак туһунан ахтан аһарбыта.

Ол туһунан «Селигдар» хампаанньа пресс-сулууспата иһитиннэрэр.

Манна C1+C2 категориялаах көмүс саппааһа – 175,2 туонна, P1+P2 категориялаах – 253 туонна баар. Күчүс бырайыага олоххо киирдэҕинэ өрөспүүбүлүкэ социальнай-экэнэмиичэскэй балаһыанньата биллэрдик тупсуо, 1500 киһи үлэнэн хааччыллыа уонна Арктика сирэ-уота сайдарыгар кыаҕы биэриэ. Лицензия усулуобуйатынан, бырайыак быһыытынан, 2029 с. диэки көмүһү хостооһун сылга 10 туоннаҕа тиийиэхтээх.