Күөх экраҥҥа «Хируурдар» саҥа сериал таҕыста

Алтынньы 7 күнүттэн  күөх экраҥҥа  “Саха” НКИХ “Хируурдар” диэн саҥа сериалы сүрэхтээтэ.

Ситиhиилээх хирург, ытыктанар эмчит Софронов биир идэлээх эдэр быраастарын Айаалы уонна Айыынаны кытары суhал хирургия салаатыгар күннэтэ дьону быыhыыр түбүктээх. Софронов ыра санаата, дьулуhар дьыалата — хирургия анал киинин тэрийии. Туохтааҕар да кырдьыгы, суобаhы өрө тутар уонна олоҕун онон сирдэтэр.  Пантелеев — эмчиттэри бэрэбиэркэлиир тэрилтэҕэ үрдүк дуоһунастаах. Кини олоххо табыллыы баайтан-дуолтан, үрдүк солоттон тахсар диэн бигэ санаалаах. Кини курдук дьону «Уол оҕото» диэн ааттыыллар.

Пантелеевтаах Софронов хаһан эрэ бииргэ үөрэммиттэрэ. Биир иирсээн кэнниттэн кинилэр суоллара икки аҥы арахсыбыт. Пантелеев ол кэнниттэн өс санаатын, иэстэhэр баҕатын ханна да гыммакка илдьэ сылдьар. Биир үтүө күн Пантелеев аатырбыт хирург Софронов үлэлиир салаатын бэрэбиэркэлии кэлэр.

Сериалы өрөспүүбүлүкэтээҕи 1 №-дээх балыыһаҕа – М.Е. Николаев аатынан Медицина национальнай киинигэр устубуттар. Саҥа сериал сценариһа – Кэрэмэс Сыдьаай, режиссера – Марина Платонова.

Сүрүн оруолларга Александр Бурнашев, Ева Шамаева-Шакор, Иван Шамаев оонньууллар.