Күөх Маайы — күргүөмнээх үлэнэн!

Таатта улууһун Дьохсоҕон нэһилиэгэр икки күннээх субуотунньук тэрээһиннээхтик буолла. Бу туһунан дьон-сэргэ улаханнык үөрэн, астынан кэпсиир. Күөх Маайы субуотунньугунан саҕалаабыттарыттан, тапталлаах нэһилиэктэригэр ырааһырдыы үлэтин ыыппыттарыттан сүргэлэрэ ордук көтөҕүллүбүтэ биллэр.

Ол курдук, эрдэттэн былааннанан, сыал-сорук туруорунан, ох курдук оҥостон, муус устар 30 уонна ыам ыйын 1 күннэригэр нэһилиэк иһин-таһын, айан суолун кытыытын күргүөмүнэн тахсан ыраастаабыттар. Манна кырачаан оҕолор: «Биһиги эмиэ көмөлөһөбүт», — диэн дьоннорун батыһан тахсыбыттара үөрүүлээх. Бу буоллаҕа, төрөппүттэрин, эһэлэрин, эбэлэрин үтүө холобур оҥостон үлэҕэ-хамнаска такайыллан иһэллэрэ. Субуотунньук туһунан суруйууларын сиһилии манна ааҕыҥ:

—Бастакы күн түөлбэлэр олорор, тэрилтэлэр үлэлиир сирдэринэн, уопсайа сүүсчэкэ киһи тахсан өрө тарта, бэрээдэктээтэ. Иккис күн 170-ча киһи бөһүөлэк таһынан ааһар айан суолун кытыытын ыраастаатылар, хаппыт маһы хомуйдулар. Тиэхиньикэлээх ыаллар, тэрилтэлэр субуотунньукка дьон-сэргэ бэлэмнээн, чөмөхтөөн кэбиспит отун-маһын, бөҕүн-саҕын тута тиэйэн истилэр.

Сарсыныгар, ыам ыйын 1  күнүгэр, сарсыардаттан музыка ньиргийэн дьону-сэргэни көхтөөх үлэҕэ ыҥырда, түмтэ. Субуотунньукка үөрэ-көтө түмсүбүт дьон эбиэккэ повардар улахан чааҥҥа буһарбыт сып-сылаас мииннэрин астына истилэр. «Победа» ХЭТ үлэ дьонугар минньигэс эти анаан аҕалбыта олохтоохтору улаханнык үөртэ. Манна нэһилиэк олохтооҕо Семен Лукич Габышев өрүү да буоларын курдук, бэртээхэй, тотоойу плов астаан аҕалбыт. Онон минньигэс, тотоойу астаах эбиэт буолла.

Субуотунньуктааччыларга сынньалаҥнара да ураты сэргэх буолла. Ол курдук, Үөһээ Бүлүүгэ буолбут Олоҥхо ыһыаҕар «Кылаан чыпчаал» бирииһи ылбыт, оһуохайга Саха сирин үтүөлээх этээччитэ, алгысчыт Афанасий Николаевич Попов дьонун түмэ тардан оһуохайдаан ньиргиттибит. Күүспүтүгэр күүс эбилинэ, эрчимирэн, тэтимирэн турдубут. Үлэ — үөрүү, үлэ — дьол диэн киэн туттуубут күүһүрдэ. Бары сүргэбит көтөҕүллэн ньиргиэрдээхтик үлэлээтибит, сылайар, сылааргыыр биһигини тумунна. Ити курдук астына үлэлээн, төрөөбүт дойдубутун таптыырбытын, харыстыырбытын үлэнэн бу курдук көрдөрөргө дьулустубут. Хардатын нэһилиэкпит, тулалыыр айылҕабыт санаабытыгар биһиэхэ махтанарга дылы буолла.

Түгэнинэн туһанан бэйэлэрин тыраахтардарын илдьэ кэлэн көмөлөспүт дьоммутугар: Саввин И.С., Заворотнай А.А., Жараев С.Е., «Победа» ХЭТ (сал. Винокуров Г.Г.), повардарбытыгар А.И Седалищеваҕа, Е.С Павловаҕа, М.Р Макароваҕа, В.Г.Харайдановаҕа, бэйэтин уу таһар массыынатын, бырысыабын уларсыбыт Петров Г.П., субуотунньукка үлэлээбит бар дьоммутугар барҕа махталбытын тиэрдэбит. Норуот күүһэ — көмүөл күүһэ! Өрүү түмсүүлээх буолуоҕуҥ!, — диэн олохтоох дьаһалтаттан иһитиннэрэллэр.

Манна даҕатан эттэххэ, бу күннэргэ Таатта үрэҕи туоруур муоста үлэҕэ киирэн, дьохсоҕоннор үөрүүлэрэ хас эмэ бүн үрдээбит. «Заречье» түөлбэҕэ уонна оттуур сиргэ барарга саҥа муосталанныбыт. Онон нэһилиэкпит баһылыгар Охотин В.А., «Тааттаавтодор» АУо генеральнай дириэктэригэр Бочонин И.И., бу муоста тутулларыгар туруорсубут, сыраласпыт дьоммутугар махтанабыт», — диэн үөрүүлэрин үллэстэллэр.

Изабелла Жараева, Анна Константинова

Хаартыскалар: А.Константинова түһэриилэрэ