Күөл үрдүнэн тардыллыбыт канаатынан хаамта!

Таалай күөл кытылыгар, муостатыгар ыы-быччары киһи муһунна. Бары цииркэ артыыһа канаатынан хаамарын долгуйа кэтэһэллэр.

Бастаан эстрада артыыстара Ника, Джида, Виталий Очиров ыллаан, сэргэхситтилэр.
Сорохтор »муоста хамсыыр, алдьанара буолуо» дэһэллэр…
Саха цииркэтин артыыһа, канаатынан хаамар эквилибрист Владимир Степанов хаамарга бэлэмнэнэр.
Култуура, духуобунай сайдыы миниистирэ Афанасий Ноев:
— Бүгүн саамай хотугу цииркэ биһиэхэ кэрэ түгэни бэлэхтээн эрэр. Үөһээ Бүлүү Далырыттан төрүттээх Владимир Степанов талба талаанын көрдөрөргө бэлэмнэнэр. Бу түгэн саха цииркэтэ хайдах курдук сайдыбытын көрдөрөр, — диэн эттэ.
Цииркэ дириэктэрэ Сергей Расторгуев:
— Бу идиэйэ үөскээбитэ ыраатта. Биһиги цииркэбит төрүттэммитэ 30 сыл, »Мамонтенок» бэстибээл тэриллибитэ 20 сыл буолла. Табылыннаҕына, барыта этэҥҥэ буолуо! — диэтэ.
Дьэ, үп-үрүҥ таҥастаах Владимир хаамар кэмигэр уу-чуумпу буолла. Бары төлөпүөннэригэр уста тураллар.
Уол аргыый аҕайдык, ол эрээри сорунуулаахтык хааман дьулуруйан истэ. Ортотугар тиийэн, торуоһа хамсаан, халбаҥнаан ылбытыгар, дьон ыксаан,  уһуутуу түстэ.

Дьэ, тиийэрэ чугаһаабытын кэннэ ытыс таһынан, тиийбитин кэннэ »ураа», »браво», »маладьыас» хаһыы ньиргийэ түстэ.
Хата, анаабыт курдук, тыал намыраабыт. Онон кутталлаах трюк толорулунна!