Кыһыл көмүһү хостуур бырамыысыланнас бүддьүөккэ 25 млрд солк киллэриэ

Ил Дархан “Якутия, вперед!” биэриигэ от ыйын түмүктэрин таһаарда. Онно кыһыл көмүс бырамыысыланнаһын,  Алдан оройуонугар «Селигдар» хампаанньа туппут көмүһү ылгыыр «Хвойное» фабрикатын туһунан эттэ.

Бу Арассыыйаҕа да аҕыйах биир саамай инновационнай экологичнай аныгы фабрика буолар.

“Фабрика 3,5 мөл. туонна руданы, 2,5 туонна кыһыл көмүһү переработкалыыр кыахтаах. Кыһыл көмүһү хостуур производствоҕа “Селигдар” хампаанньа бэйэтин күүскэ көрдөрдө, хостооһунун улаатыннардар улаатыннаран иһэр. Кини Күчүстээҕи көмүс үөскээбит сирин сүрүн акционера буолар. Онно сотору кэминэн эмиэ биир бырайыак олоххо киириэ.

Кыһыл көмүс сыаната аан дойдуга эмиэ үрдүк. Онон билигин бу салаа өрөспүүбүлүкэ бүддьүөтүгэр нолуок төлөөччүнэн буолар. Быйылгы бүддьүөккэ 25 млрд солк. киириэхтээх”, — диэтэ Ил Дархан.