Кыһыл көмүс киэргэллэри ылан баран комиссионнай маҕаһыыҥҥа туттарбыт

Дьокуускай куоракка уопсайа 300 тыһ. солк. суумалаах кыһыл көмүс киэргэллэрин уордарбыт дьахтартан полиция отделыгар сайабылыанньа киирбитин туһунан ИДьМ Дьокуускайдааҕы салаатын пресс-сулууспата иһитиннэрдэ.

Суһал-ирдиир үлэ кэмигэр  холуобунай ирдэбил үлэһиттэрэ уорбаланааччыны — 31 саастаах олохтоох эр киһини туппуттар.

Ол курдук быһаарыллыбытынан, дьахтар биллэриинэн чааһынай маастары булан, кыһыл көмүс киэргэллэрин хат ууллаттара биэрбит.

Уорбаланааччы көмүһү ылан баран ыйыллыбыт болдьоҕор  тугу да гымматах. Итиэннэ сибээскэ тахсыбат буолбут.

Албын маастар  киэргэллэри  комиссионнай маҕаһыыҥҥа туттарбытын туһунан кэпсээбит.

Билигин эр киһиэхэ РФ Холуобунай кодексын 160 ыст. 3 чааһынан холуобунай дьыала көбүтүлүннэ.