Кыһыл Кырдалтан Кыайыыны уһанса

Суоттуга Уус Алдан улууһун устуоруйатыгар суураллыбат суолу-ииһи хаалларбыт Кыһыл Кырдал диэн кэрэхсэнэр кэрэ көстүүлээх сир баар.

Манна, Аҕа дойду кырыктаах сэриитин 1941-1942 сс., улууспутуттан фроҥҥа ыҥырыллан барааччылар Суотту сэттэ кылаастаах оскуолатын дьиэтигэр түмсэн, байыаннай үөрэҕи баран, үгүстэрэ дойдуларыгар бүтэһигин хонон-өрөөн ааспыт сирдэрэ буолар.
1942 с. бэс ыйыгар бу оскуола дьиэтиттэн сэттэ сүүсчэкэ эдэркээн дьоммут сэриигэ барбыттарын олохтоохтор курус ахтыыларыттан билэбит. Атаарааччылардыын, сэриигэ барааччылардыын быстыбат колонна Кыһыл Кырдалтан биэрэккэ «Лермонтов» борохуокка киирбиттэр. «Кытылынан колонна ааспыт суола хара буорунан көрөн хаалбыта. Собус-соҕотохто чуумпуран, чуҥкуйан, быраҕыллыбыт өтөххө олорор курдук буолбуппут…», — диэн ахталлар оччотооҕу кэм туоһулара.

Улуу Кыайыыны саа саадах тутан кыргыс толоонугар уһансыбыт, кыайыы туһугар тоҥууну-хатыыны, хоргуйууну, аас-туор олоҕу аахсыбакка, туох баар кыһамньыларын ууран туран тыылга үлэлээбит аҕа көлүөнэбит — сүрэхпитигэр чугастык тутар тапталлаах ытык дьоммут хорсун быһыылара үйэлэргэ умнуллубатын!

Раиса Черкашина,

Суотту, Уус Алдан.