Кыһыл Сыыр баһаарынай чааһын дьиэтигэр сокуон кэһиилэрин туоратар эбээһинэс сүктэрилиннэ

Бүлүү улууһун борокуратуурата  Өрөспүүбүлүкэтээҕи судаарыстыбаннай баһаарынай сулууспа Бүлүү улууһунааҕы 15-с №-дээх этэрээтин Кыһыл Сыыр бөһүөлэгин харыстыыр 2-с №-дээх баһаарынай чааһын үлэтин  бэрэбиэркэлээтэ.

Хос бэрэбиэркэлиир уорганнар исписэлиистэрин кытыннаран ыытыллыбыт бэрэбиэркэ түмүгүнэн, баһаарынай чаас муостата уларытыллыахтааҕа быһаарылынна. Ону таһынан, бары хосторго уонна гараас иһигэр истиэнэлэргэ хайа барыылар, уу тохтубут суоллара, дьиэ үрдэ уонна истиэнэ икки ардыгар хайаҕастар бааллара, дьиэ тутуута сүрүн дьиэ уонна гараас икки ардынан икки аҥыы хайдан эрэрэ билиннэ. Бэрэбиэркэ кэмигэр, ону сэргэ, баһаарга утары куттал суох буолуутун уонна терроризмҥа утары үлэ сокуонун кэһиилэрэ булулуннулар. Булуллубут кэһиилэри туоратар сыалтан, «Саха Өрөспүүбүлүкэтин судаарыстыбаннай баһаарынай сулууспата» судаарыстыбаннай бүддьүөт тэрилтэтин начаалынньыгар этии киллэриллиннэ. Ол эрээри, этиини көрүү түмүгүнэн кэһиилэри туоратар дьаһаллар ылыллыбатылар. Онон сибээстээн, улуус борокуратуурата суукка ирдэбил ыыппыт.

Суут быһаарыытынан борокуруор ирдэбилэ толору билинилиннэ. «СӨ Судаарыстыбаннай баһаарынай сулууспата» булуллубут сокуон кэһиилэрин туоратыыны хааччыйар, оттон СӨ Олох-дьаһах куттала суох буолуутун хааччыйыыга уонна гражданскай оборуона дьыалаларыгар министиэристибэтигэр дьаһаллары тэрийэр эбээһинэс сүктэрилиннэ. Суут быһаарыыта сокуоннай күүһүгэр киирдэ, диэн СӨ Борокуратууратын пресс-сулууспата суруйар.