«Кыһыл Сыыр-Мастаах» гаас ситимин линейнай чааһын тутуу түмүктэннэ

«Сахатранснефтегаз» ньиэп-гаас национальнай хампаанньа үлэһиттэрэ «Кыһыл Сыыр-Мастаах» магистральнай гаас ситимигэр 84 килэмиэтири сыбааркалаатылар.

Билигин тутуу түмүктүүр түһүмэххэ тиийдэ: каркастары сыбааркалыыллар, кыраан узелларын уонна телемэхээнньикэ хонтуруолунай пуунун таҥаллар.
Хампаанньа сыл бүтүөр диэри пусконаладочнай уо.д.а. үлэлэри ыытарга бэлэмнэнэр. Магистральнай гаас ситимин тутуу 2022 сыл муус устарыгар саҕаламмыта. Бу – Уһук Илиҥҥэ гаас ситимин киэҥ хабааннаах бырайыактарыттан биирдэстэрэ. Эбийиэк гааһынан хааччыллыы эрэллээх буолуутун үрдэтиэҕэ уонна Саха сиригэр гаас магистральнай ситимин систиэмэтин кэҥэтиэҕэ.

Айсен Николаев саҥа гаас ситимин тутуу саҕаланыыта былаас федеральнай уорганнарын кытары өр сыллаах үлэ түмүгэ буоларын туһунан эппитэ. Бырайыагы олоххо киллэрэргэ федеральнай бүддьүөттэн 2,8 миллиард суумалаах үп бэриллибитэ.