Аны күһүн Судаарыстыбаннай Дуума дьокутааттарын быыбара буолуоҕа

Быйыл күһүн тохсус ыҥырыылаах Судаарыстыбаннай Дуума дьокутааттарын талыахтара. Бу сырыыга Дума быыбарыгар Донбасс уонна Новороссия олохтоохторо аан бастаан куоластыахтара.

Дуума быыбарын кытта тэҥҥэ 39 эрэгийиэн дьокутааттарын, ону таһынан РФ субъектарын баһылыктарын быыбардара ыытыллыахтара.

Быйыл Куоластааһын биир кэлим күнэ балаҕан ыйын 20 күнүгэр буолуохтаах – бу күн ахсыс ыҥырыылаах Судаарыстыбаннай Дуума конституциянан көрүллүбүт боломуочуйатын болдьоҕо бүтэр. Госдуума дьокутааттарын быыбарын ананыытын туһунан РФ бэрэсидьиэнэ Владимир Путин биллэриэхтээх. Сокуоҥҥа олоҕуран, быыбары аныыр туһунан ыйаах куоластыыр күнтэн 110 хонуктан эрдэ буолбакка уонна 90 хонуктан хойутаабакка илии баттанар. Урут ыытыллыбыт икки Дуума хампаанньатыгар – 2016 уонна 2021 сыллардаахха дойду баһылыга ыйааҕы бэс ыйын 17 күнүгэр илии баттыыра.

РФ Киин быыбардыыр хамыыһыйатын баһылыга Элла Памфилова санаатынан, 2026 сыллааҕы федеральнай хампаанньа үрдүк таһымнаахтык ааһыаҕа. Дуумаҕа бэйэлэрин бэрэстэбиитэллэрин Донбасс уонна Новороссия олохтоохторо аан бастаан талыахтара.