Күһүн уһуурун хайдах билэбит?

Бу күннэргэ сайын иккистээн кэлбиттии итии күннэр тураллар. Дьон аны күһүн хайдах буолуон сэмээр билгэлиир. Күһүн уһуурун хайдах билиэххэ сөбүй?

— Үһүс Ыспааһапка туруйа көппөтөҕүнэ, күһүн уһуур

— Сибэтиэй Лэбириэнтий күнү (атырдьах ыйын 23 күнэ) бастакы аҥарыгар күөлү кэтээн көрөллөр. Күөл долгуна суох, чуумпу буоллаҕына – күһүнэ чуумпу, оттон кыһына улахан тыала-кууһа суох буолар

— Михиэй күн (атырдьах ыйын 27 күнэ) кыра тыаллаах буоллаҕына – кураан күһүн, ардаатаҕына – балаҕан ыйа ардахтаах буолар

— балаҕан ыйыгар этиҥ эттэҕинэ –  күһүн уһуур уонна итийэр

— балаҕан ыйыгар тигээйи баар буоллаҕына, сымнаҕас күһүнү күүтүллэр

— силбиктээх сайын, силбиктээх күһүн буоллаҕына, күһүн уһуур

— көтөрдөр күһүн алларанан аастахтарына – силбиктээх, тыаллаах, тымныы, үөһэнэн аастахтарына – кураан, сылаас күһүн буолар

— кус оҕотун иккистээн ууга киллэрдэҕинэ, күһүн уһуур. Сайын иккитэ сымыыттыыр

— күһүөрү сайын (атырдьах ыйын ортотугар) хатыҥ, талах сэбирдэхтэрэ эрдэ саһардахтарына кыһын эрдэ кэлэр

— сайын кэҕэ хойукка диэри (Бөтүрүөп кэнниттэн) эттэҕинэ, күһүҥҥүтэ уһуур

— сарбынньах (рябина) сибэккитэ хойутаан ситтэҕинэ, кэлэр күһүн уһуур

— ньургуһун, онтон да атын сир симэҕэ оттор атырдьах ыйыгар хойуутук тахсыбыт буоллахтарына, сыһыыга үөн-көйүүр элбиир, тыаҕа тэллэй хойуутук тахсар

— тигээйи күһүн хойукка диэри иһийбэккэ сырыттаҕына, күһүнэ хайаан да уһуур.

(И.Сосин “Төгүрүк сыл: күн-дьыл халандаара” уонна И.Сосин, И.Неустроев “Сахалыы күнү-дьылы билгэлээһиннэр” кинигэлэртэн).