Кыһыннары ититиллэр оҕо былаһааккатын тутууну мээр болҕомтоҕо ылла

Дьокуускай куорат мээрэ Евгений Григорьев пресс-кэмпириэнсийэ кэмигэр суруналыыстар киин куоракка сылы эргиччи үлэлиир итии былаһааккалары үлэлэтэр туһунан волонтердар этии киллэрбиттэрин тиэртилэр.

“Кыһыҥҥы кэмҥэ итии тохтобуллары олоххо киллэриини тобуллубут.  Тымныыттан харыстыыр икки сылаас туалеты үлэҕэ киллэрдибит. Эһиил үһүс итинник туалеты тутуохпут. Онон кыһыннары үлэлиир оҕо былаһаакката да тоҕо кыаллыа суоҕай, оҥоруохха сөп. Эһиил Водянова былаһааккатын саҥардан оҥоруу бырагырааматыгар кыайыылаах бырайыактаах дьоҥҥо ити этиини киллэрэн, сорох өттүн ититиллэр гына оҥоруохха сөп. Оҕо кыһыҥҥы кэмҥэ иллэҥ кэмигэр дьиэҕэ  хаайтара олорбокко, успуордунан дьарыктаныан, бириэмэтин туһалаахтык сүүрэн-көтөн атаарыан сөп буоллаҕа. Ити этиини сорук оҥостон, болҕомтоҕо ылан,  эһиилгиттэн олоххо киллэрэ сатыахпыт”, — диэн хоруйдаата Евгений Григорьев.

Онон эһиилгиттэн оҕолорго кыһыҥҥы кэмҥэ ититиллэр ичигэс былаһаакка баар буоларыгар эрэниэҕиҥ.