Кыһыны атаарыы бырааһынньыга пааркаҕа ыытыллыаҕа

Дьокуускайга Кыһыны атаарыы бырааһынньыга муус устар 5 күнүгэр  Култуура, сынньалаҥ пааркатыгар ыытыллыаҕа.

Кыһыны атаарыы бырааһынньыктааҕы бырагырааматыгар уус-уран кэлэктииптэр, эстрада артыыстарын кэнсиэртэрэ, маассабай оонньуулар, араас көрдөөх күрэстэр бааллар. Оҕолорго оонньуур былаһаакка баар буолуоҕа, маны тэҥэ, паарка аттракционнара үлэлиэхтэрэ. Бу бырааһынньыкка дьиэ кэргэнинэн кэлэн, ыраас салгыҥҥа бириэмэни көхтөөхтүк бииргэ атаарарга туһуланыаҕа.

Дьону аһатар киоскалар күүскэ үлэлиэхтэрэ. Онон минньигэстик, тото-хана аһыыр кыах баар буолуоҕа.

Билигин сынньалаҥ пааркатыгар сааскы сезоҥҥа бэлэмнэнии үлэтэ бара турар — дьон хаамар суолларын хаартан ыраастыыллар, хомуллубут хаары тиэйэллэр, аттракционнары бэрэбиэркэлииллэр, өрөмүөннүүллэр.

Бэнидиэнньиккэ куорат дьаһалтатын мунньаҕар мээр Евгений Григорьев паарка Кыһыны атаарыыга бэлэм буоларын курдук, үлэни түргэтэтэргэ сорудахтаабыта.