Салгыы
Кыһыны сылаастык көрүстүбүт

Кыһыны сылаастык көрүстүбүт

15.10.2022, 16:30
Бөлөххө киир:

Кыһын саҕаланар Бокуруоп күнүн Суотту нэһилиэгин «Төрүт» уонна «Механизатордар» түөлбэлэрэ ититиигэ холбонон көрсөммүт, үөрүүбүт муҥура суох.

«Механизатордар» түөлбэлэрэ 100%, «Төрүт» түөлбэ аҥаара ититиллэн, дьэ, оһоҕу манаабакка, оһохтон тутуллубакка сылаастык, сынньалаҥнык олоруохпут буоллаҕа. Бүгүн төһө да былыттаах, сиппэрэҥ күн буоллар, дьон-сэргэ өрө көтөҕүллэн, кэлии-барыы, сүүрүү-көтүү — дьиэлэргэ холбуурга күргүөмүнэн сырыттылар. Оннук буолуохтаах даҕаны,биһиги курдук тыйыс айылҕалаах дьоҥҥо түүннэри-күнүстэри оһоҕу оттон,тымныылыын хатыһаҕын.

Евгений Васильевич Павлов салайааччылаах «Спецсервис» ХЭО тэрилтэ 2020 сыл сайыныттан хочуолунай тутуутун саҕалаабыта. Билигин, оннооҕор тиэргэҥҥэр баанньыгы тутаргар араас дьыалата-куолута кыайтарбакка эрэйдээччи. Оччотугар маннык улахан социальнай эбийиэк тутуллара, элбэх кэпсэтии-ипсэтии, билсии-көрсүү эрэйиллэрэ сэрэйиллэр. Сатахха Суотту сааскы халаан уутугар эмсэҕэлиир буолан, хочуолунай тутуллуохтаах сиригэр, «ууга барар сир» диэн көҥүл бэриллибэккэ, нэһилиэкпит баһылыга Василий Иннокентьевич Иванов, киһитэ кини буолан, ситистэ. Тутуу быыһык кэмҥэ түбэһэн, сыана халбаҥнаан үгүс күчүмэҕэйдэри көрүстүбүт. Турбаларбыт даҕаны, эмискэ киһи иһэ хайа барар сыанаҕа тахсан, оттон эмиэ да түһэн боростуой киһи өйдөөбөтө үгүс. Итинник балаһыанньаны көрөн туран, сорох дьон, «давай да давай» дииллэрин киһи өйдөөбөт.

«Спецсервис» хааччахтаммыт эппиэтинэстээх тэрилтэ уолаттара: Окоемов Михаил Иванович, сыбаарсык Копырин Владимир Васильевич, Константинов Петр Егорович былырыын интэринээт, кулууп теплотрассатын тарданнар, бу саас муус устарга сылааһынан хааччыйбыттара. Оттон быйыл атырдьах ыйыттан үөһээ этиллибит түөлбэлэргэ туруммуттара. Быйыл күһүн ардахтаах баҕайы буолан, уолаттар үлэлииллэригэр эрэйи да көрдүлэр. Сир-дойду сиигирэн, сыбааркаһыт алҕас тобуктаан уокка оҕустаран эрэйдэннэ аҕай. Ардах тохтообокко, ыксаан сабыы туруора-туруора үлэлээтилэр, аны уоппут сотору-сотору арахсан туһунан кыһалҕа.
Үлэ хаамыытын суруйдахха чэпчэкитин аанньа, ис-иһигэр киирдэххэ эрэдээгэ элбэх. Ким эрэ теплотрасса ааһарыгар тиэргэнин көҥүллээбэт, атын киһи олбуорун таһынан ыыттарбат. Суотту бэйэтэ даҕаны сааскы халаан уутугар барар буолан, дьиэлэр бэрээдэгэ суох тутуллан, генеральнай былаан диэн суох.

Аны «Чуумпу кытыл» түөлбэ холбоноро уонна «Төрүт» түөлбэ сорох ыаллара хааллылар, онон билигин даҕаны сылааһы күүтээччи элбэх.

Түгэнинэн туһанан, «Механизатордар» түөлбэни иһирэхтик ахтыахпын баҕарабын. Бу түөлбэ субуотунньугунан теплотрассаларын кырааскалаан, наадалаах матырыйаалынан бүрүйэн сүҥкэн үлэни ыыттылар. Ол эрэ буолуо дуо, хас сыл аайы саас түөлбэлэригэр ырааһырдыы үлэтин ыытаннар, сайыны ыраастык көрсөллөр.

Түмүкпэр,Суотту олохтоохторо хас да сыл күүппүт ититиибит олоххо киирбититтэн үөрүүбүт муҥура суох. «Спецсервис» уолаттарыгар, чуолаан М. И. Окоемовка, В. В. Копыриҥҥа, П. Е. Константиновка дьон туһугар ардаҕы-сирдэҕи билиммэккэ, хаары-сиппэрэҥи аахсыбакка үлэлээбит үтүө дьыалалара, үйэлээх буолан куруук ааттара ааттана турдун. Ититиигэ холбоммут дьон муҥура суох махталларын этэллэр. Куруук маннык олох үөһүгэр, үлэни өрө тутан,дьон махталларыттан кынаттанан эдэрдии эрчими ыһыктыбакка, үөрэ-көтө сылдьыҥ! Дьоллоох,доруобай буолуҥ!

Куоракка тардыһа сатаабакка,
Кыһыҥҥы тымныыттан куттаммакка,
Туохтан даҕаны толлубакка
Тыаҕа холкутук олоруохха.

Куруутун оһоҕу манаабакка,
Киниэхэ олоҕу анаабакка,
Киһилии сиэринэн сылдьыахха,
Кэнчээри ыччаты иитиэххэ.

Иннокентий ПОПОВ-ОҔУРУОТТААХ

Бары сонуннар
Салгыы
9 февраля
  • -46°C
  • Ощущается: -46°Влажность: 65% Скорость ветра: 1 м/с

Сообщить об опечатке

Текст, который будет отправлен нашим редакторам: