Кылааһынан көрсүһүү кэнниттэн түбэһиэх сиргэ утуйан хаалан, харчытын уордарбыт…
30.08.2024, 17:00
С.Львова хаартыската
Бөлөххө киир:
Сайыҥҥы өттүгэр араас бырааһынньыктар элбииллэр: ким эрэ сыбаайбалыыр, ким эрэ үбүлүөйдүүр. Сорохтор оскуоланы, үрдүк, орто үөрэх кыһатын бүтэрбиттэрэ хас эрэ сыл буолбутун бэлиэтииллэр. Дьэ биир оннук кылааһынан көрсүһүүнү, арааһа, биир дьахтар өр сылларга өйдүү-саныы сылдьара буолуо.
Бу күннэргэ Дьокуускай куорат полициятын 2-с нүөмэрдээх отделыгар 57 саастаах дьахтартан төлөпүөнүн уонна баанын счетуттан харчытын уордарбытын туһунан сайабылыанньа киирбит.
Дьахтар сайабылыанньатыгар суруйбутунан, куорат таһыгар оскуоланы бүтэрбиттэрин 40 сылын бэлиэтээн баран, бырааһынньык кэннэ сарсыарда 5 чаас саҕана арендаласпыт оптуобустара кэлбит. Айаннаан иһэн дьахтар урукку кылааһынньыгын кытары тыл-тылга киирсибэккэ, этиспиттэр уонна автовокзал чугаһыгар оптуобус тохтобулугар тахсан хаалбыт. Итиэннэ атах балай баран, бэйэтэ сиргэ охтон түспүт дуу биитэр ким эрэ охторон түһэрэн, утуйан хаалбыт. Уһуктубута, суумката, төлөпүөнэ суох эбит. Инньэ гынан чугас баар бааҥҥа тиийбит. Онуоха баан үлэһиттэрэ дьахтар счетуттан 244 000 солк. суумаҕа ону-маны атыыласпыттарын эппиттэр.
Холуобунай ирдэбил оперативниктара уорууга уорбаланар киһини булбуттар. Ол курдук, урут сууттана сылдьыбыт 21 саастаах эр киһи эбит.
Кини кэпсээбитинэн, сарсыарда 6 чаас саҕана уулуссаҕа суумка сытарын көрбүт. Суумкаттан төлөпүөнү, кыһыл көмүс оҥоһуктары ылбыт. Төлөпүөнү «форматтаан» баран, баан мобильнай сыһыарыытын хачайдаабыт. Счекка улахан суумалаах харчы баарын көрөн, уу харчынан уста сатаабыта табыллыбатах. Ол оннугар эр киһи iPhone атыыласпыт, эрэстэрээҥҥэ аһаабыт, таҥас-сап атыыласпыт. Уорбут кыһыл көмүстэрин ломбардка туттарбыт.
Билигин эр киһиэхэ РФ Холуобунай кодексын 158 ыст. 3 чааһынан холуобунай дьыала көбүтүллүбүт.
+1
4
+1
1
+1
+1
+1
16
+1
2
+1
Сообщить об опечатке
Текст, который будет отправлен нашим редакторам: