Кылаан Кындыл алгысчыт, оһуохайдьыт быһыытынан арылынна

Алтынньы 5 күнүгэр СӨ култууратын туйгуна, ырыаһыт Кылаан Кындыл «Таптаспыт күһүммүт кэллэҕэ» диэн төрдүс айар кэнсиэрэ буолан ааста.

«Сэргэлээх уоттара» култуура киинин уораҕайа тобус-толору көрөөччүнэн туолбут. Бу күн икки кэнсиэр буолбута, билиэт эрдэ бүппүт этэ. Ол курдук, Кылаан Кындыл айар үлэтин, ырыаларын сэргээччилэр, сырса сылдьан истээччилэр элбэхтэр. Ырыаһыт, дьиҥэ, киэҥ эйгэҕэ биллибитэ сүүрбэччэ сыл буолла эрээри, бу төрдүс эрэ кэнсиэрэ. Кини ырыа тылыгар, матыыбыгар эрэ болҕомтотун уурар буолбатах, айар киэһэтин эмиэ кыһаллан, кичэйэн оҥорорун сөбүлүүр. Бу да киэһэ ырыалар эт куолаһынан, көмүс күөмэйинэн ылланнылар.

Кэнсиэргэ кини доҕотторо, айылҕаттан маанылаах куоластаах Сиэйэ Уола, Иоганн Матвеев кытыннылар, «Күн Өркөн» үҥкүү ансаамбыла киэргэттэ. Кэнсиэри режиссер Алена Павлова туруорда.

Дьэ, бииртэн биир иэйиилээх ырыалар кыталыктыы кыырайан, кубалыы дайан, көттөр көтөн истилэр. Киэҥ экрааҥҥа ырыалар клиптэрэ тэҥинэн көстө турда. Кындыл ырыаларыгар барыларыгар клип уһулан иһэр эбит.

Ону тэҥэ, бу кэнсиэргэ Кылаан Кындыл бэйэтин алгысчыт, тойуксут, оһуохайдьыт быһыытынан арыйда. Кэнсиэр аһыллыытыгар Хотой Айыыга сүгүрүйэр алгыс туомун толордо, туойан дьырылатта. Онтон дьоро киэһэ бүтүүтэ оһуохай тылын таһааран, көрөөччүлэрин сэргэхситтэ. Уопсайынан да, көрөөччүлэрин кытта истиҥник кэпсэтэн, сылаас эйгэни тэрийдэ. Көрөөччүлэр тэтимнээх ырыаҕа тэҥҥэ үҥкүүлэстилэр, үөрдүлэр-көттүлэр.

— Тойукка уонна эстрадаҕа ырыа көҥкөлөйгө уонна күөмэйгэ олоруута олох атын буолар. Ону тэҥинэн баһылаан ыллыыр киһи сэдэх. Миигин сүрүннээн эстрада ырыаһытын эрэ курдук билэллэр. Ол эрээри, идэлээх дьон, саха төрүт култууратын илдьэ сылдьар, ытыктыыр дьонум “сахалыы ырыаҕын-тойуккун сайыннар” диэн такайа сылдьаллар. Былыр-былыргыттан кэлбит, канон быһыытынан халбарыйбат сокуоннардаах, ыллыҥ да алгыс этэн барбаккын. Уһуйааччыларгар үөрэнэн, хааҥҥар баары искиттэн таһааран, сайыннараҕын. Бу кэнсиэрбэр алгысчыт, тойуксут, оһуохайдьыт быһыытынан арылынным. Маны салгыы сайыннарыам, — диэн Кылаан Кындыл этэр.

Ырыаһыты кытта атах тэпсэн олорон кэпсэтиини  «Саха сирэ» хаһыат бээтинсэтээҕи нүөмэригэр сиһилии ааҕаарыҥ.