“Кылаас салайааччыта-2025” күрэс буолан ааста

Бэҕэһээ нэдиэлэ устата барбыт “Кылаас салайааччыта-2025” өрөспүүбүлүкэтээҕи күрэһи түмүктүүр үөрүүлээх тэрээһин буолан ааста. Тэрээһиҥҥэ өрөспүүбүлүкэ 20 улууһуттан учууталлар сүүмэрдэнэн кэлэн кытыннылар.

Үөрэҕи сайыннарар уонна идэ таһымын үрдэтэр институт дириэктэрин бастакы солбуйааччы, педагогика билимин дуоктара Галина Алексеева: “Саамай  дьоһуннаах, кылаас салайааччылара, учууталлар кэлэн кытыннылар. Бу күннэргэ оскуолаҕытыгар хайдах курдук сыал-сорук туруоран, кыһанан туран үлэлииргитин көрдүбүт. Билиҥҥи курдук иитии инники күөҥҥэ турар уустук кэмигэр сыраҕытын ууран үлэлииргит иһин махтанабыт. Саамай сүрүнэ ис дууһаҕытын ууран, сөбүлээн туран үлэлииргитин көрдүбүт” – диэн бэлиэтээтэ.

Түөрт түһүмэхтээх долгутуулаах күрэс кэнниттэн өссө биир долгутуулаах түгэн үүннэ – кыайыылаахтар ааттарын биллэрии. 2021 сыллааҕы “Кылаас салайааччыта” күрэс кыайыылааҕа Анна Петухова тахсан лауреаттар ааттарын биллэрдэ. Ол курдук, лауреат үрдүк аатын Марина Николаевна Данилова (Уус Алдан улууһа), Надежда Сергеевна Егорова (Дьокуускай к. 25-с нүөмэрдээх оскуолата), Алина Петровна Сивцева (Нам улууһа), Галина Александровна Анисимова (Бүлүү улууһа), Любовь Николаевна Захарова (Таатта улууһа), Ирина Васильевна Андреева (Кэбээйи улууһа), Прасковья Борисовна Собакина (Чурапчы улууһа), Татьяна Григорьевна Алексеева (Горнай улууһа) ыллылар.

“Кылаас салайааччыта” күрэс 2021 уонна 2023 сыллааҕы муҥутуур кыайыылаахтара Анна Петухова, Эльвира Борисова ааттарыттан анал бирииһи Алена Викторовна Винокурова (Анаабыр улууһа) ылла. “Саамай креативнай кылаас салайааччыта” номинацияҕа Мария Романовна Степанова (Горнай улууһа), “Оҕолорго тапталын уонна бэриниитин иһин” номинацияҕа Людмила Николаевна Алексеева (Өлүөхүмэ улууһа), “Профессионализм  уонна маастарыстыба” номинацияҕа Акулина Степановна Николаева (Томпо улууһа), “Кылаас кэскиллээх салайааччыта” номинацияҕа Маргарита Сергеевна Лупенко (Өймөкөөн улууһа) кыайыылааҕынан таҕыстылар.

Үөрэҕи сайыннарар уонна идэ таһымын үрдэтэр институт иитэр үлэҕэ уонна эбии үөрэхтээһиҥҥэ кафедратын анал бирииһин Маргарита Сергеевна Лупенко (Өймөкөөн улууһа), М.К.Петрова кэлиэгэлэрин, доҕотторун аатыттан анал бирииһи Галина Александровна Анисимова (Бүлүү) туттулар.

Институт саамай үрдүк наҕараадата – үрүҥ көмүс бэлиэлээх “Саха сирин мэтэдииһэ” аат Оксана Дмитриевна Чикачеваҕа (Алдан улууһа), Жанетта Алексеевна Егороваҕа (Үөһээ Бүлүү улууһа)  иҥэрилиннэ.

Үүнэр көлүөнэни иитиигэ бэриниилээх, үтүө суобастаах үлэлэрин иһин “Саха сирин эрэлэ” түөскэ иилинэр бэлиэнэн Валентина Валентиновна Пахомова (Дьокуускай куорат 20-с нүөмэрдээх оскуолатын алын кылааһын учуутала), “СӨ үөрэҕин систиэмэтин туйгуна” түөскэ иилинэр бэлиэнэн Василиса Валерьевна Неустроева (Амма улууһун Эмис оскуолатын аангылыйа тылын учуутала)  наҕараадаланнылар.

“Кылаас салайааччыта-2025” өрөспүүбүлүкэтээҕи күрэс муҥутуур кыайыылааҕынан Алдан оскуолатын биирдиилээн биридимиэттэри чиҥэтэн үөрэтэр оскуола нуучча тылын уонна литэрэтиирэтин учуутала Оксана Дмитриевна Чикачева буолла.

М.К.Петрова дьиэ кэргэнэ: “Инникитин өрөспүүбүлүкэни, дойдуну сайыннарыахтаах үүнэр көлүөнэни иитиигэ сыраҕытын уурар, илиигит сылааһын иҥэрэр учууталларга махтанабыт. Кыһаллан туран барыларын кытта уопуккутун үллэһиннигит, биһиги толкуйдаттыгыт, туохха болҕомто ууруохха сөбүгэр сирдээтигит. Оҕолору кытта үлэҕэ салгыы саҥа суоллары көрдөөҥ, өрүү иннигит диэки дьулуһан иһиҥ” – диэн муҥутуур кыайыылаахха, призердарга туһаайан эҕэрдэ тылларын тириэртилэр.

Күрэс 1 истиэпэннээх дьупулуомунан Василиса Валерьевна Неустроева (Амма улууһун Эмис оскуолатын аангылыйа тылын учуутала), 2 истиэпэннээх дьупулуомунан Валентина Валентиновна Пахомова (Дьокуускай куорат 20-с нүөмэрдээх оскуолатын алын кылааһын учуутала), Виктория Алексеевна Олесова (Хаҥалас улууһун Булгунньахтаах оскуолатын аангылыйа тылын учуутала), 3 истиэпэннээх дьупулуомунан Мария Дмитриевна Филиппова (Мэҥэ Хаҥалас улууһун В.П.Ларионов аатынан Майа оскуолатын аангылыйа тылын учуутала), Жанетта Алексеевна Егорова (Үөһээ Бүлүү 2-с нүөмэрдээх оскуолатын алын кылааһын учуутала) наҕараадаланнылар.

Оҕо үөрэҕэр ситиһиититтэн саҕалаан инники дьылҕатын туһугар туруулаһар, сороҕор, төрөппүттэрдээҕэр ордук сэмэлэнэр дьон – кылаас салайааччылара. Өрөспүүбүлүкэ таһымнаах күрэскэ саамай таһымнаах, дьоһуннаах, эрэллээх учууталлар сүүмэрдэнэн кытталлара саарбахтаммат. Онон чуолаан бу күрэскэ, хотторуулаах диэн суох, бары кыайыылаахтар!