Кыыллаах нэһилиэгин олохтоохторо «Тулаайах кыыс» киинэни уһулан сүрэхтээтилэр

Өлүөхүмэ улууһун Кыыллаах нэһилиэгин олохтоохторун күүһүнэн уһуллубут «Тулаайах кыыс» киинэ көрөөччү дьүүлүгэр таҕыста. Уус-уран киинэ Кыыллаах оскуолатын VK Видео ханаалыгар таҕыста.

Режиссер Раиса Лавернова туруорбут драма жанрыгар уһуллубут киинэтэ Өлүөхүмэ прозаига Родион Данилов – Ородьумаан «Көйгө кыыс» диэн кэпсээнигэр олоҕурар. Киинэҕэ XIX үйэ ортотугар-бүтүүтүгэр саха ыччата үөрэххэ-билиигэ тардыһан эрэр кэмин туһунан кэпсиир.

Сценарийын Мария Поскачина суруйбут, субтитр тылбааһын Мария Ларионова толорбут, киинэҕэ анаан муусуканы Иннокентий Корнилов айбыт, оттон видеомонтааһын Иннокентий Малгаров оҥорбут. Киинэҕэ сүрүн оруоллары Саха Өрөспүүбүлүкэтин Өлүөхүмэ улууһун Кыыллаах сэлиэнньэтин араас саастаах, идэлээх олохтоохторо толордулар. Режиссер бу киинэни «түмэл-киинэ» диэн ааттыыр. Кини этэринэн, үлэ ол кэмнээҕи кыыллаахтар олохторун-дьаһахтарын, таҥастарын-саптарын, туттар тэриллэрин көрдөрөр уонна арыйар сыаллаах.