Н.Осипов ыытта
Үйэлэртэн-үйэлэргэ саха омук сүрүн дьарыгын хороҕор муостаахтары, сыспай сиэллээхтэри Куорунай улууһун Мытаах нэһилиэгин дьоно-сэргэтэ билиҥҥи кэмҥэ диэри хото иитэн кэллэхпит. Бүгүҥҥү туругунан, 500 -тэн тахса ынах сүөһү, 600-тэн тахса сылгы араас хайысхалардаах хаһаайыстыбаларга иитиллэн тураллар.
Нэһилиэккэ ынах сүөһү иитиитигэр Арассыыйа үтүөлээх пиэрмэрэ Руслан Чемезов, сыспай сиэллээхтэри тэниитиигэ таһаарыылаах үлэлээх СӨ тыатын хаһаайыстыбатын үтүөлээх үлэһитэ Серафим Григорьев уонна да атыттар бүтэн быстыбат түбүктээх, сыралаах үлэлээх тыа сирин сүрүн дьарыгар айымньылаахтык үлэлии сылдьаллар.
Серафим Серафимович 1988 сыллаахтан бэйэтин төрөөбүт нэһилиэгэр сылгыһытынан үлэтин саҕалаабыта. Кини билигин улууска үчүгэй үлэтинэн биллэр хаһаайыстыба баһылыга.
Серафим сүрүн болҕомтотун сүтэ быһыытыйбыт өбүгэлэрбит сүрүн астарын кымыс оҥоруутун сөргүтэргэ үлэлиир, ол туоһутунан кымыс араас көрүҥнэрин оҥорон улууска, өрөспүүбүлүкэҕэ быыстапкаларга кыттан дьон –сэргэ биһирэбиллэрин ылар. Эдэр ыччаты, дьиэ кэргэни сылгы иитиитигэр чугаһатар, кымыһы оҥоруу кистэлэҥнэригэр үөрэтэн дьоҥҥо-сэргэҕэ дьайыылаах буолууга туһаайан 2022 сылтан олохтоох түмэл-галерея (директор А.Н.Егоров) кыттыылаах “Өбүгэ үгэһин сөргүтэн” диэн аныгы олох сиэринэн бырайыагы нэһилиэккэ ыыталлар. Сүнньүнэн бэс ыйын ортотуттан, от ыйын 10 чыыһылатыгар диэри бөһүөлэк кытыытыгар баар анал биэ ыыр сиригэр кэлбит ыалдьыттарга сылгы иитиитигэр сүбэ-ама, кымыһынан айах тутуу, биэ үүтүн амсатыы, биэ ыатыыта ыытыллар. Биэни ыаһыҥҥа норуот сиэрин-туомун тутуһан ыыллар, ыабыт үүттэрин дьиэлэригэр илдьэн кымыс оҥосторго тутталлар. Бу бырайыагы биһирээн айылҕабыт ситэн турар кэмигэр: Сунтаартан, Намтан, Амматтан, Дьокуускайтан, Бүлүүттэн, Хаҥаластан, Хатастан улууспут нэһилиэктэриттэн кэлбиттэрэ, дуоһуйа сынньанан, көрөн-истэн, билэн-көрөн, сахалыы таҥнан симэхтээх акка хаартыскаҕа түһэн бараллар.
Бырайыагы үлэлэтээччилэр салгыы өссө дириҥэтэн үлэлииргэ улахан былааннаахтар, ол курдук Мытаах нэһилиэгэр туризм сайдарыгар олук буолар бырайыак диэн сыаналыыллар.
Николай Осипов, РФ суруналыыстарын сойууһун чилиэнэ, Куорунай, Дьиикимдэ бөһ.
Ил Дархан туһаайан этиитигэр дьоҕус урбааны өйүүр боппуруос болҕомтоҕо ылыллыа диэн, норуот дьокутаата, Ил Түмэн…
“Илии сылааһа” сыах (сал. Саввина И.Е.) филиала Куокуйдааҕы “Надежда” холбоһук (сал. Еремеева Т.У.) бу сылга…
Дьокуускайдааҕы полиция 1-кы №-дээх отделын дьуһуурунай чааһыгар олохтоох дьахтар кини аатыгар сокуоннайа суохтук 145 тыһ.солк.…
СӨ муниципальнай тэриллиилэрин бэрэстэбиитэллээх уорганнарын дьокутааттарын 3-с сийиэһэ куорат уокуруктарын, тыа сирин нэһилиэктэрин дьокутааттарын түмтэ.…
Саха норуодунай суруйааччыта, Саха Өрөспүүбүлүкэтин култууратын үтүөлээх үлэһитэ, СӨ Суруйааччыларын сойууһун бэрэссэдээтэлинэн үлэлээбит Егор Петрович…
Быйыл өрөспүүбүлүкэ 13 арктическай улууһугар барыларыгар эргиэн логистическай кииннэрэ аһылыннылар. Бу соругу Айсен Николаев Судаарыстыбаннай…