Күн-дьыл туруга: этиҥнээх ардах, тыал уонна куйаас

Бүгүн, от ыйын 26 күнүгэр, Саха сирин үгүс өттүгэр күнүс +27+32°С кыраадыска диэри сылыйыа, оттон соҕуруу +37°С кыраадыска диэри итийиэ диэн синоптиктар билгэлииллэр.

Өрөспүүбүлүкэ арҕаа, Өлүөнэ өрүс алын тардыытынан, күнүс киин улуустарынан арҕаа өттүгэр, сорох сиринэн илин быстахтык ардахтыа, сорох сиринэн этиҥнээх ардах түһүөҕэ.

Мииринэй улууһугар күүстээх самыыр, Халыма-Индигиир улуустарыгар кыралаан ардыыр, кыра тыаллаах, этиҥнээх ардах кэмигэр сөкүүндэҕэ 15-20 м/с түргэннээх тыаллаах.

Салгын температурата түүн +11+16°С, арҕаа +16+21°С, хотугулуу-арҕаа, хоту +1+6°С кыраадыс сылаас. Күнүс +27+32°С кыраадыска диэри итийиэ, соҕурулуу-арҕаа, соҕуруу +32+37°С, хотугулуу-арҕаа, илин +15+20°С, хоту муора кытылынан +13+18°С кыраадыс.

Дьокуускайга салгын температурата түүн +15+17°С, күнүс 30+32°С кыраадыска диэри итийиэ, сөҥүүтэ суох, илинтэн сөкүүндэҕэ  2-7 м/с түргэннээх тыаллаах.