Сарсын кэккэ оройуоннарга ардах түһэрэ сабаҕаланар

Сарсын, атырдьах ыйын 3 күнүгэр, кэккэ оройуоннарга сорох сиринэн этиҥнээх быстах ардах түһэрэ сабаҕаланар. Бу туһунан Cаха сиринээҕи күнү-дьылы кэтээн көрөр сулууспа иһитиннэрэр. 

Ол курдук, сарсын ардах Өлөөн, Эдьигээн, Өймөкөөн оройуоннарыгар түүн, Мииринэй оройуонугар күнүс түһүөҕэ. Ону таһынан, быстах ардах бу түүн Алдаҥҥа кэлиэҕэ, күнүс — Сунтаарга, Ньурбаҕа, Муомаҕа уонна Үөһээ Халымаҕа. Этиҥ кэмигэр сөкүүндэҕэ 15-18 миэтирэ түргэннээх тыал түһүөҕэ.

Салгын температурата түүн  +8 +13°С, күнүс +22 +27°С.

Онтон Дьокуускайга сарсын куйаас күн туруоҕа. Салгын температурата +24 +26° С.