«Күн Эко» — экологтары иитэн таһаарар!

Кэмпэндээйигэ «Сир уустара» төгүрүк сыл үлэлиир киин оҕолору араас хайысханан сайыннарар. Бу сайын Саха сирин Айылҕа харыстабылын министерствота уонна Билим академията иккис төгүлүн «Күн Эко» экспедицияны тэрийэн оҕолору чинчийии үлэтигэр уһуйаллар.

«Айылҕаны харыстыам, үтүө санаалаах буолуом», — диэн мэктиэ тыл бэрилиннэ. Түөрт уон оҕоҕо күөх хаалтыс иилилиннэ. Бу курдук айылҕаны харыстыыр күөх пионердар сүрэхтэннилэр. Кэмпэндээйигэ «Сир уустара» лааҕырга «Күн Эко» диэн экспедиция иккис төгүлүн чинчийии үлэтин ыытар.

Айылҕа харыстабылын министерствота, Наука академията, «Сир уустара» оҕону сайыннарар киин биир ситиминэн «Учуутал, үөрэнээччи, учуонай, инспектор» диэн торумнаах экспедиция үлэтин ыыталлар. Бу иннинэ Күндэйэҕэ эмиэ бу курдук үлэ барбыта. Бырайыак ааптара, министерство үлэһитэ Нюргуяна Гуринова: «Биһиги оҕолору айылҕаҕа сыһыаран учуонайдары кытта биир кэккэҕэ сырытыннаран билиини хаҥатабыт уонна биллэн турар экологтары иитэн таһаарабыт», — диэн санаатын үллэстэр.

Үөннээх Хайа — Кэмпэндээйи киэн туттуута. Оҕолор мантан арааһы булан дойду онобулун дириҥэтэллэр. Холобур бу күннэргэ бара сылдьан белемниты, трубкалаах молюсканы, күлгэрини, кылабычыгас тааһы о.д.а. дьиктилэри булан чинчийии ыыталлар. Бу хайаҕа сылдьан Дьааҥыттан төрүттээх хас да экспедицияны тэрийбит Саха сирин билимин чинчийээччитэ, экспедиция салайааччыта Саргылана Седалищеваны кытта кэпсэттим. Кини этэринэн: «Бу хайа онобула олус дириҥ, инньэ динозаврдар кэмнэриттэн таптайыллан тахсыбыта көстөр», — диэн хайа хас биирдии кырсын ыйан-кэпсээн көрдөрдө. Кэмпэндээйиттэн Ваня Федоров бу сиртэн олус элбэх уҥуох арааһын булбутун Сэлиини үөрэтэр үлэһит Станислав Колесов оҕолордуун сылгы, таба, тайах уҥуохтара диэн быһаардылар. Бу манна оҕолор учуонайдары кытта гидрогеология, гидрология, озероведение, ботаника, орнитология хайысхаларынан научнай бырайыак оҥорон таһаарыахтара. Бу иннинэ күөллэри кэрийэн чинчийбиттэр, ол туһунан Ирбэт тоҥу үөрэтэр институт үлэһитэ Надежда Павлова: «Туох баар чугастыы баар күөллэри кэрийэн проба ыллыбыт, Сордоҥнооххо уу сибэккитэ үүнэрин сэргээтибит, оҕолор олус интэриэстээхтик ылсан үлэлэһэн эрэллэр».

Лааҕыр аһыллыытыгар Сунтаартан экология салайааччыта Сергей Николаев, гос.инспектор Анатолий Лукин, ойуур хаһаайыстыбатын инженера Николай Тихонов тахсан үлэ хаамыытын билистилэр, сүбэ-соргу биэрдилэр, күөх пионердарга хаалтыс баайан айылҕаны харыстыырга ыҥырдылар. Кинилэри кэккэ Кэмпэндээйи инспектора Николай Герасимов күн аайы сылдьыһан лааҕырга көмө буолар.

«Күн Эко» сүрүн соруга экологтары иитэн таһаарыы! Ол онно үктэл Кэмпэндээйи сирэ!

Тускулаана ГОРОХОВА-КОБЕЛЬЯНОВА