«Күн сардаҥалара» үтүө санаалаах дьоҥҥо махтаналлар

ДЦП-лаах уонна ментальнай кэһиллиилээх оҕолору өйүүр киин “Күн сардаҥалара” (“Лучики света”) эрэгийиэннээҕи уопсастыбаннай тэрилтэтэ 10 сыллаах үбүлүөйүн Оҕо көмүскэлин күнүгэр Емельян Ярославскай аатынан түмэл “Алгыс балаҕаныгар” бэлиэтээтэ.

Манна араас ыарыылаах, доруобуйаларынан хааччахтаах оҕолор төрөппүттэрин кытары мустан үөрэн-көтөн тарҕастылар. Оҕолору “Киин куорат” кафеттан Мария Акимова, Абдурахмон Тагдиралиев оҕуруот аһынан уонна фруктанан, “Якутия” ФАПК генеральнай дириэктэрэ Павел Степанов уо.д.а. күндүлээтилэр. Ону таһынан төрөппүт Жанна Костина уонна блогер, кондитер Артем Винокуров минньигэс туортарын астына сиэтилэр.

Бырааһынньык алгысчыт Сергей Алексеев алгыһынан аһылынна. Бырааһынньыгы биһиги ийэлэрбит, “Күн сардаҥалара” РОО бэрэссэдээтэлэ Ирина Рассейкина уонна актыбыска Виктория Матвеева-Егорова иилээн-саҕалаан ыыттылар. Кыттыылаахтары оҕолорбут Рассейкин Витя, Баховец Дарья, Плотникова Евгения, Колесов Максим, Матвеева Ева уонна ыҥырыллыбыт ыалдьыттар 4 саастаах Меликян Матвей , DANCЕ брейк-данс кэлэктиибэ (салайааччы Скрябин Валентин) эҕэрдэлээтилэр.

Ону тэҥэ оҕолору “Айар уустар” креативнай индустрия кэллиэһин маастардара (куратор Поскачин Данил), преподаватель Захарова Аина, устудьуоҥкалар  Потапова Валерия, Никифорова Валерия уонна  Семенова Карина, биһиги тэрилтэҕэ куруук көмөлөһөр “Алмазэргиэнбанк” АКБ-тан аниматордар аралдьыттылар. Биһиги бастыҥ доҕотторбут, «Мэрри Поппинс» оҕо чааһынай уһуйаанын иитээччилэрэ маастар-кылаас ыыттылар.

“Күн сардаҥалара” сыл аайы бу күн бастакы кылаас үөрэнээччилэрин, оскуоланы бүтэрээччилэри уонна биһиги тэрилтэбит актыбыыстарын сыл түмүгүнэн бэлиэтиир.

Түгэнинэн туһанан, биһиги улахан махталбытын “Якутскэнергго” ПАО, “Эирстудио” ИП, «Сюрприз» шардар устуудьуйаларыгар,  “Восхождение”  УХК, «Добун» устуудьуйаҕа, «Пространство» хаартыска устуудьуйатыгар,  урбаанньыт Анна Яковлеваҕа, “Водоканал” АУо, “Кондрагметалл” АУо уонна өрөспүүбүлүкэбит үтүө санаалаах дьонугар махталбытын тириэрдэбит.

Уопсастыбанньык, суруналыыс, ийэ Вероника Чупрова 2014 сылллаахха социальнай ситимҥэ бөлөх арыйан, доруобуйаларынан хааччахтаах оҕолор төрөппүттэрэ, сокуонунан бэрэстэбиитэллэрэ мустан араас кыһалҕалары кэпсэтэллэр, дьүүллэһэллэр. Ити сыл  өссө  «ВКонтакте»  бөлөх аһыллыбыта. Вероника Чупрова 2015 сылтан “Ыра санаа туолар” аахсыйаны саҕалаабыта. Онон оҕолор ыра санааларын толорон, кэлээскэлээх футболга оонньуур, оптуобуска олорсор, кумирдарын кытары көрсүһэр буолбуттара. Ити курдук, итинник ыра санааларын күн бүгүҥҥэ диэри толороллор, аахсыйа салҕанар. Вероника Дмитриевна итинэн тохтоон хаалбатаҕа. ДЦП-лаах уонна неврология ыарыылаах оскуола саастаах оҕолор күнүс сылдьар кииннэрин(уһуйаан кэриэтэ) тэрийэргэ холоммута. Төһө да ити баҕа санаа олоххо киирбэтэҕин иһин, санаатын түһэрбэккэ бэйэтин күүһүнэн 3 дьоҕус салааны тэрийбитэ. Билиҥҥитэ бу оҕолор күнүс кэлэн сылдьар кииннэрэ, иитээччилэр суохтарынан,  сабыылаах.

Билигин өрөспүүбүлүкэҕэ  “Күн сардаҥалара” тэрилтэҕэ 200-чэ дьиэ кэргэн баар. Куоракка баар Кииҥҥэ араас маастар-кылаастар, судаарыстыба тэрилтэлэрин кытары көрсүһүүлэр уо.д.а. ыытыллаллар. Киин толору кыаҕынан үлэлээбэтин да иһин, төрөппүттэр олус түмсүүлээхтэр. Билигин бэрэссэдээтэлинэн Ирина Васильевна Рассейкина үлэлиир.

Бу сыллар тухары биһиэхэ тиһигин быспакка көмөлөһөр бар дьоммутугар иитиллээччилэрбит ааттарытан дириҥ махталбытын тириэрдэбит.

“Күн сардаҥалара” чилиэннэрэ