Күн сылааһын уонна эйэни түстүүр аналлаах – «КүнЭйэ»

Уус Алдан улууһун Найахы иистэнэр уран тарбахтаах далбар хотуттара дойду көмүскэлигэр сылдьар буойуннарга анаан таҥас, харысхал тигэр «КүнЭйэ» иистэнньэҥнэр түмсүүлэрин тэринэн, үлэ үөһүгэр сылдьаллар. Бүгүн биһиги биир нэһилиэк иллээх-эйэлээх дьоно хайдах түмсэн, Кыайыы иһин үлэлии-хамсыы сылдьалларын туһунан кэпсиэхпит.

Төрүөт буолбут үтүө дьыала

2024 сыл атырдьах ыйыгар саҕаламмыта. Найахы нэһилиэгин бочуоттаах олохтооҕо, Саха сирин уус-уран оҥоһуктарын маастара Харитина Ивановна Гоголева салайар түөлбэтэ уопсастыбаннай суолталаах бырайыактарга анаммыт муниципальнай грант күрэҕэр кыайан, 200 000 солк. суумалаах үбү ылбыта.

Харитина Ивановна бу харчыны олохтоох дьаһалтаны кытары сүбэлэһэн баран, нэһилиэк уопсай туһатыгар — байыаннай дьайыыга сылдьар уолаттарга көмөлөһөр иистэнэр сыаҕы тэрийэн, дьонун сатабыллаахтык аттаран үлэлэтэн барбыта. Нэһилиэк баһылыга Петр Слепцов уонна иис үөрэхтээх маастар Раиса Атласова бу санааны иилэ хабан ылан, өйөөн, туох наадатын барытын былааннаан, ахсынньыга куораттан үс бырамыысыланнай уонна биир дьиэтээҕи иистэнэр массыынаны, атын да тэриллэри атыылаһан аҕалан үлэлэрин саҕалаабыттара.

Үлэ күөстүү оргуйар

Былырыын Саҥа дьыл кэнниттэн сыах үлэтин саҕалаан, иистэнньэҥнэр илиилэрин сылааһынан байыаннай таҥастары тигэн барбыттара. Түмсүүнү «КүнЭйэ» диэн ааттаабыттара — күн сылааһын уонна эйэни түстүүр диэн дириҥ суолталаах. Манна уопуттаах маастардар Раиса Атласова, Туйаара Ушницкая уонна кинилэргэ эбии көмө буолар түөрт иистэнньэҥ — Лия Сивцева, Мария Рожина, Надежда Мухина, Анжела Сидорова буолан күн иллэҥэ суох үлэлииллэр.

Бастакы улахан сакаас куораттан, байыастар дьиэ кэргэттэрин түмсүүтүттэн (Дарья Данилова, Күннэй Сивцева) киирбитэ: 35 медбрат комбинезонун тигии этэ. Матырыйаалын куораттар бэйэлэрэ ыыппыттара, өссө биир иистэнэр массыынаны бэлэх ууммуттара. Иистэнньэҥнэр үлэлэрэ ол курдук «күөстүү оргуйбута».

Бүтүн нэһилиэк — Кыайыы туһугар

Байыаннай дьайыыга, Кыайыыны уһансыыга аҥаардас иистэнньэҥнэр эрэ буолбакка, бүтүн Найахы нэһилиэгэ эмиэ кыттыһар.

Мария Федорова салайааччылаах «Симэх» түмсүү уран тарбахтаах иистэнньэҥнэрин илиилэрин сылааһынан 51 паара кылынан угунньаны өрбүттэр, 70 харысхалы оҥорбуттара. Александр Васильев дириэктэрдээх Найахы орто оскуолатын оҕолоро суруйбут истиҥ суруктара, туойтан оҥорбут 70 харысхаллара эмиэ байыаннай дьайыыга тиийбитэ.

Светлана Петрова бэрэссэдээтэллээх Бэтэрээннэр сэбиэттэрэ «Кыайыы туһугар!» аахсыйанан 115 паара наскыны хомуйан ыыппыттара. Ону сэргэ Валентина Исакова салайыытынан 20 киһи түмсэн хаххалыыр сиэккэни өрөллөр. Олус туһалаах, уолаттарбытыгар харысхал буолар маннык 21 сиэккэни баайбыттар.

Бу бастакы уопсай күүһүнэн хомуллубут гуманитарнай көмө тохсунньу 31 күнүгэр Мариупольга айаннаабыт.

Улуустааҕы волонтерскай ыстаап филиала

Олунньу 4 күнүгэр Уус Алдан улууһун ыччат уонна дьиэ кэргэни өйүүр социальнай тэрилтэ салайааччыта Саргылаана Никитина уонна кини хамаандата кэлэннэр, «КүнЭйэ» сыаҕын волонтерскай ыстаап филиалынан бигэргэппиттэрэ. Билигин сыах улуус биэрэр матырыйаалынан быһан-тигэн, байыастары таҥыннарар киин буолла.

Үлэ иккис уонна үһүс түһүмэхтэринэн штурмовик көстүүмнэрэ, тактическай ырбаахылар, флис таҥастар тигиллэн бардылар. Раиса Атласова бэйэтин вышивальнай массыынатынан улуус дьаралыгын, позывнойдары, тус шевроннары быысыпкалаан оҥорор.

Инникигэ соруктар

Билигин «КүнЭйэ» иистэнньэҥнэрэ 2026 сыл кулун тутарыгар барыахтаах төрдүс гуманитарнай көмөнү бэлэмнииллэр. Маскировочнай сиэккэни баайарга олохтоох маҕаһыыннар («Сарыал», «Сайдам», «Сайдам+», «Астык») күүс-көмө буолаллар. Найахы орто оскуолатын учууталлара уонна үөрэнээччилэрэ 4 куул соботтон бакыаттаах мииннэри оҥоро сылдьаллар.

Маннык нэһилиэк тэрилтэлэрэ, түмсүүлэрэ, үөрэнээччилэрэ уонна олохтоохторо биир тыынынан түмсэн үлэлииллэрэ — биһиги уолаттарбытыгар кыайыыга эрэли уонна дойдуларын сылааһын тиэрдэр. Улуустааҕы волонтердар ыстааптара уоппускаҕа кэлбит байыастары төттөрү барар кэмнэригэр маннык таҥыннаран ыыталлара — улахан көмө буолар.

Найахылар көмөлөрө — бу дойдуга таптал, кыһамньы уонна эрэл ситимэ. Найахы дьонун үтүө санаата Кыайыыны чугаһатар!

Петр Слепцов, Найахы баһылыга:

— Найахы нэһилиэгин дьоно-сэргэтэ байыаннай дьайыыга кытта сылдьар уолаттарбытыгар, төһө кыалларынан, бэйэлэрин кылааттарын киллэрэр, Кыайыыны уһансар. Биһиги нэһилиэкпититтэн элбэх уол байыаннай дьайыыга сылдьар. «КүнЭйэ» иистэнньэҥнэр түмсүүлэрэ улуус гранын ылан, улахан кыамталаах иистэнэр массыыналары атыылаһан, үлэлии сылдьаллар. Араас байыаннай таҥаһы тигэн, байыаннай дьайыыга ыыта олороллор. Ону таһынан, хаххалыыр сиэккэни баайар түмсүүлээхпит. Урбаанньыттарбыт «Сарыал» маҕаһыын (Кривошапкина О. Я.), «Сайдам» маҕаһыын (Румянцев П. В.), «Сайдам+» маҕаһыын (Лукачевская М. П.), «Астык» маҕаһыын (Сивцева А. Н.) көмөлөһөннөр матырыйаалынан хааччыллаллар. И. И. Гоголев‑Дыргыабай аатынан Найахы орто оскуолатын үлэһиттэрэ собону хатараннар миин оҥоро сылдьаллар. Сотору кэминэн ону барытын инники кирбиигэ ыытыахтаахпыт. Ону таһынан, байыаннай дьайыыга дьоруойдуу охтубут уолаттарбытын үйэтитэн, үс байыас аатынан уулуссаны ааттаатыбыт уонна кинилэргэ анаан үс кинигэни таһаардыбыт.