Бүгүн магнитнай буурҕа күүһүрэр

Күҥҥэ корональнай дьөлөҕөс үөскээн, Сир магнитосфератыгар дьайан саҕалаата. Учуонайдар сэрэтэллэринэн, биһиги планетабыт күн тыала аҕалбыт плазма сүүрээнигэр киирдэ. Ол түмүгэр магнитнай буурҕа саҕаланар куттала биллэ улаатта.

КЧИ  уонна КСФИКүн көхтөөх буолуутун лабораториятын учуонайдарын дааннайынан, Күн дьайыыта уруккутун курдук үрдүк таһымнаах — 10-тан 7 балл. Бүтэһик суукка устата Күҥҥэ түөрт С уонна М кылаастаах эстии бэлиэтэннэ, ол иһигэр күүстээх M1.0 эстии.

Күҥҥэ эстиилэр элбэхтик буола тураллар да, Сиргэ быһаччы дьайыыны оҥорботтор. Чугас икки хонукка куйаар күнүн-дьылын сүрүн төрүөтүнэн хас да хонуктааҕыта сулуска үөскээбит корональнай дьөлөҕөс буолар.

Барыллаан сабаҕалааһынынан, бүгүн, алтынньы 20 күнүгэр, Сир магнитосферата хамсаан, күн устата мөлтөх таһымнаах буурҕалар буолуохтарын сөп. Магнитосфера «уоскуйбут» туруктаах буолуон сөбө 34% кэриҥэ. Оттон көбүтүллүбүт турукка киириэн сөбө — 35%, онтон мөлтөх буурҕаҕа кубулуйуон сөбө 31% кэриҥинэн сыаналанар.

Геомагнитнай балаһыанньа бэнидиэнньик күн ортотугар бигэ турукка киириэҕэ, онтон нэдиэлэ устата уһуннук уоскуйуу буолара күүтүллэр.

Маннык кэмҥэ дьон доруобуйатыгар дьайыыта

Магнитнай буурҕа кэмигэр үгүс киһи төбөтө ыалдьар, туруга мөлтүүр, кыыһырымтаҕай буолар, хаанын баттааһына хамсыыр. Ону таһынан утуйар уу кэһиллиэн, болҕомто мөлтүөн уонна хроническай ыарыылар бэргиэхтэрин сөп. Ордук сүрэх-тымыр уонна ньиэрбэ кэһиллиилээх, кырдьаҕас уонна күн-дьыл уларыйыытыттан тутулуктаах дьон уратытык эрэйдэнэллэр.

Быраастар бэйэни эмтэнимэҥ диэн сүбэлииллэр, ол эрээри ыарыы билиннэҕинэ, чэпчэки дьайыылаах эмптэри иһиэххэ сөп: магний B6, валидол, корвалол, глицин эбэтэр оттон оҥоһуллубут уоскутар эмптэри. Хаан баттааһына оонньуур буоллаҕына, быраас анаабыт, хаан баттааһынын түһэрэр эбэтэр үрдэтэр эмптэри иһиэххэ наада.