Күндээдэ эбээлэрэ уһуйааҥҥа ыалдьыттаатылар

Өрөспүүбүлүкэ күнүн бары улуустарга өрө көтөҕүллэн туран, бу күннэргэ араас дириҥ ис хоһоонноох тэрээһиннэри ыыттылар.

Ньурба улууһун Күндээдэтигэр уһуйаан үлэһиттэрэ Оҕо саас уонна Дьиэ кэргэн сылыгар бэрт сонун тэрээһини тэрийдилэр. Бу туһунан «Сыл учуутала-2010» өрөспүүбүлүкэтээҕи күрэс лауреата, СӨ үɵрэҕириитин бэпэчиитэллэрин Сэбиэтин Гранын, «Арассыыйаны кытта бииргэ 370 сыл» бэлиэ хаһаайына, СӨ үɵрэҕириитин туйгуна, Ньурба оройуонун Күндээдэтээҕи «Кэнчээри» оҕо саадын сэбиэдиссэйэ Венера Степанова  сонунун үллэһиннэ:

— Уһуйааммытыгар «Күндээрэ» эбээлэр түмсүүлэрин ыҥырбыппыт. Дьоммут олус сонун кэһиилээх кэлэн үөртүлэр.

Кинилэр төрүт таҥастарын кэтэн, симэнэн, хааман көрдөрдүлэр, бэйэлэрин ырыаларын бэлэхтээтилэр.

Дьиэлэригэр өрүү көрөр күндү киһилэрэ, сиэдэрэй бэйэлээх таҥастаах эбээлэрэ тупсан хаалбытын,  соһуйбут кырачаан дьон ылы-чып чуумпуран олорон көрдүлэр.

Эбиитин ыллаан бүтээттэрин кытта, «браво» диэн хаһыылаах буоллулар.

Нэһилиэкпит баһылыга Яков Замятин кырачаан дьоммутун суолталаах күнүнэн эҕэрдэлээтэ уонна уһуйаан, нэһилиэк олоҕор көхтөөхтүк кыттар үлэһиттэрбитигэр, төрөппүттэрбитигэр Мария Григорьеваҕа, Григорий Ананьевка, Афанасий, Аграфена Самсоновтарга, Николай, Мария Степановтарга, Максим, Жанна Кондратьевтарга махтал суруктары туттарда.

Хардатын оҕолорбут ырыа ыллаатылар, кырачаан Виктория хоһоон аахта, оттон үлэһиттэрбит сып-сылаас саламаатынан, сахалыы баахыланан барыларын күндүлээтилэр.

Дьоро да күҥҥэ үлэлэһэр бырайыакпытын умнубакка, үйэлэри уҥуордаан илдьэ кэлбит өссө биир баайбыт — саха ынаҕа ойууламмыт Иннокентий Корякин «Алаас хотуна» хартыынатын билиһиннэрии буолла. Бу Бүтүн Арассыыйатааҕы «Уһуйааҥҥа хартыына түмэлэ» ситим бырайыак иһинэн үлэбит буолар.

Дьоро чааска кыттыбыт эбээлэрбитигэр (салайааччы Светлана Замятина, куратор Иринада Ефремова, баянист Николай Ананьев) ис сүрэхтэн махтанныбыт уонна сахалыы санаалара саргылана, ыллыктаах тылллара айхаллана, үтүөлэрэ үксүү, кэрэлэрэ кэҥии турарыгар баҕардыбыт.