«Күндээдэ» сопхуос үбүлүөйүн бэлиэтээтилэр

Бэртээхэй бэс ыйа түмүктэниэн икки хонук иннинэ хоһооҥҥо хоһуллубут, ырыаҕа ылламмыт Күннээх Күндээдэҕэ олус  үчүгэй тэрээһин буолан ааста. Бу  тыа сирин олоҕун уйгутун уһаммыт «Күндээдэ» сопхуос тэриллибитэ 40 сылын бэлиэтиир дьоро күн.

Түөрт уон сыл анараа өттүгэр бэс ыйыгар оччотооҕу «Ньурба» сопхуос Күндээдэтээҕи отделениетын баазатыгар саҥа сопхуос тэриллэр диэн, ойууру солоон, бүтүн дэриэбинэ тутуллуутун иилээн-саҕалаан, дьон-норуот махталын, хайҕабылын ылбыт, таптаан «Бытык Уйбаан» диэн ааттаппыт Иван Васильевич Николаев  директорынан ананан кэлбит.

Саҥа сопхуос, тэрээһин маанылаах сандалытын тула олорон,  сопхуос  бэтэрээн үлэһиттэрэ ахтан ааспыттарынан, 400-чэкэ үлэһиттээх  бөдөҥ хаһаайыстыба буола үүнэн-сайдан, туруу хоһуун үлэһит дьонунан аатырбыт.

«Пиэрибэй Маайга отуттан тахса тыраахтарынан, матассыыкылынан парааттыыр буоларбыт»— диэн бэрккэ астына Суоппар Миитэрэй кэпсиир. Мас бөҕөтө кэрдэн, тутуу бөҕө барбытын, үрүҥ илгэни үрүлүйэ сүүрдэ, сыспай сиэллээҕи сыһыы муҥунан сырса, күндү түүлээх саһылы иитэ, үлүмнэһэ үлэлээбит сылларын кэлбит эрэ барыта сирэйдиин-харахтыын сырдыы мичийэ ахтан-санаан сюһэн-сэппэ буоллулар. Оттон маанылаах сандалыга бииртэн биир туруктаах олох бэлиэтэ, саха киһитин сөбүлүүр аһа — үөрэ миинэ, собо, кырбаһынан сыалаах эт тардыллан истэ.

Дьоро күн алгыстаах аһыллыытын норуот эмчитэ, алгысчыт Алиса Михайловна ыытта. Кулууппут үлэһиттэрэ Элеонора Семенова, Александр Ананьев, ыччаттарбыт Марфа Платонова, Ирина Иванова кылыйар кылыһах куоластарынан ырыанан, оһуохайынан, хомус тардан, кэрэ күнү өссө киэргэттилэр.

Эҕэрдэ эҥээрдээх наҕараада туттарыытын нэһилиэкпит баһылыга Яков Евгеньевич Замятин саҕалаата, онтон Ньурба оройуонун баһылыгын тыа хаһаайыстыбатын боппуруостарыгар солбуйааччы, тыа хаһаайыстыбатын департаменын начальнига, улуус мунньаҕын депутата Леонид Владимирович Ушканов баһылык аатыттан эҕэрдэ тиэртэ уонна  өрөспүүбүлүкэбит Ил Түмэнин бочуотунай грамоталарыттан, махтал суруктарыттан саҕалаан,  наҕараадалары туттарда.

Ол кэннэ эҕэрдэ тылы, наҕараадалааһыны үбүлүөйү тэрийбит, сопхуос үлэтин-хамнаһын тутан хаалан, күн бүгүн өрөспүүбүлүкэҕэ биир бигэ туруктаах тэрилтэнэн биллэр «Күндээдэ» акционернай тэрилтэ генеральнай директора Сергей Александрович Захаров бэтэрээннэргэ, билиҥҥи үлэһиттэргэ махталын этэн туран, үлэлээн ааспыт директордарга сэмэй бэлэхтэри, үрдүк көрдөрүүлээх үлэһиттэргэ Хайҕал, Махтал суруктары туттарда. Дьоро күҥҥэ кэлбит үлэһит дьонтон биир да умнуллубакка «Күндээдэ сопхуос 40 сыла» бэлиэни түөскэ анньынан, бэркэ астыннылар.
Тыа сирин тутаах тэрилтэтин быһыытынан сопхуос да, билиҥҥи агрофирмабыт да нэһилиэк хас тэрилтэтин кытта бииргэ үлэлэһэр, өйүүр-өйөнсөр буолан, бырааһынньыгынан уһуйаан, оскуола салайааччылара, норуот айымньытын дьиэтин аатыттан Анатолий Петров эҕэрдэ эттилэр, сэмэй бэлэхтэрин туттурдылар. Дьэ, уонна эрчимнээх эдэр сааһы, ахтылҕаннаах ааспыт кэми эргитэн, хамаанданан көрдөөх күрэх, ойор-тэбэр оһуохай, ыанньыксыттар күрэхтэрэ тэриллэн, чаҕыл күннээх, илгийэр сөрүүн тыаллаах «туран биэрбит» бэртээхэй күнү эбэн-сабан кэрэхсэнэр кэрэ күн дэттилэр.
Онньууга кыттыспыттар, кыайыылаах буолбуттар араҕас илгэ арааһа, тааралаах арыынан илии тутуурданан, өттүк хараланан, үөрүүлэрэ өссө үрдээтэ, сопхуос үлэлээн ааспыт сылларын үйэтитэргэ сыралаһан  булгаахтырдаабыт Варвара Николаевна Титоваҕа истиҥ махталы олохсуттулар.

Улуу бэйиэт эппит тылларын бэйэбэр туһулаан «мин онно сылдьыбытым, кыынньар кымыс испитим, саҥыйахтаах алаадьы сиэбитим уонна  астына дьолломмут дьоммун көрөн олус үөрбүтүм» диэн уларыта соҕус суруйан, сонуммун түмүктүүм.

Венера Степанова, Күндээдэ.