Күндээдэҕэ ардай аһыылаахтар түөрт тыйы охторбуттар

Ардай аһыылаахтар нэһилиэктэргэ ыкса чугаһаан сыспай сиэллээхтэри охтороллоро элбээтэ. 

Ол курдук, бу күннэргэ Ньурба улууһун Күндээдэтигэр хас даҕаны бөрө түөрт тыйы охторбуттар. Ол иннинэ өссө икки сылгыны сиэбиттэрэ биллэр.

Күндээдэ баһылыга Яков Замятинныын кэпсэппиппитигэр, «Муниципальнай таһымҥа ыксаллаах быһыы-майгы балаһыанньатын биллэриэхпит. Булчуттарга уматыгынан  көмөлөһүөхпүт, кыһыл былаахтары оҥоруохпут. Нэһилиэнньэ бөрөһүттэргэ харчынан көмөлөһүөхпүт дииллэр. Ол харчыны хайдах хомуйары толкуйдуохпут», — диэн иһитиннэрдэ.