Күндэйэҕэ «Буран-шоу» күрэҕи дьон сэҥээрдэ

Сунтаар улууһугар күндэйэлэр олус интэриэһинэй, улууска хаһан да ыытылла илик «Буран шоу» күрэһин тэрийэн ыыттылар.

Айылҕаҕа, тыаҕа сылдьа үөрүйэх эр дьон бэйэлэрин сатабылларын уонна техникаларын кыамтатын көрдөрдүлэр.

Улуус нэһилиэктэриттэн барыта 12 хамаанда 4 көрүҥҥэ куоталастылар. Араас албастары туһанан хас биирдии түһүмэх интэриэһинэй, тыҥааһыннаах буолла. Буранистар хапкааны иитэн, сыал ытан, көрөөччүлэргэ сэргэх күрэс түһүлгэтин олохтоотулар.

Маны тэҥэ ууну-хаары билиммэт техникалар быыстапкалара туран, дьон сэҥээриитин ылла. Биһирэнэрэ диэн, бу хас биирдии эр киһи баҕа санаата буолбут баараҕай техникалары бэйэлэрэ таҥан, оҥорон таһаарбыттар.

Сыыдам сырыылаах буранистар ортолоруттан үс көрүҥ түмүгүнэн, кылаан кыайыылааҕынан Күндэйэттэн Айаал Игнатьев буолла. Маннык эр дьону көҕүлүүр күрэстэр өрөгөйдүү турдуннар.

@suntaar_ulus