Күндэйэҕэ — «Буран-шоу»
Сунтаар улууһугар Күндэйэҕэ култуура киинин дириэктэрэ Леонид Саввинов улуус эр дьонун түмэ тардар күрэстэри олус сэргэхтик тэрийэр.
Тыа сиригэр олус наадалаах тимир көлө – «Буран-шоу» күрэһэ Күндэйэҕэ иккис сылын ыытыллар. Манна хаарынан айаны сэҥээрээччилэр түмсэн сааскы бырааһынньыгы уруйдаатылар, күрэс түһүлгэтин көҕүлүттэн туттулар.
Быйылгы тэрээһин нэһилиэк кадровай булчуттарын үйэтитэр сыаллаах ыытылынна. Кинилэртэн биирдэстэрэ Арассыыйа Дьоруойа Филипп Евсеев аҕата буолар. Барыта үс түһүмэхтээх күөн көрсүһүүгэ буранистар бэйэлэрин маастарыстыбаларын, техникаларын кыамтатын көрдөрдүлэр.
Дьон интэриэһин тардар, тыҥааһыннаах күрэс «Буран-шоу» муҥутуур кыайыылааҕынан Кутанаттан Владимир Попов таҕыста.
Улуус баһылыга Анатолий Григорьев спорду сэҥээрээччи буоларын быһыытынан уонна улуус эр дьонун көҕүлүүр, түмэр тэрээһин үрдүк таһымҥа ыытыллыбытынан тэрийээччилэри эҕэрдэлиир. Маннык күрэхтэр өссө да ыытылла турдуннар.
@suntaar_ulus
Сообщить об опечатке
Текст, который будет отправлен нашим редакторам: