Күҥҥэ улахан эстии буолла

Олунньу 23 күнүгэр киэһэ 10 чаас 20 мүнүүтэҕэ (Москва бириэмэтинэн) Күҥҥэ улахан эстии таҕыста. Бу эстии  X2.0 кылаастаах диэн учуонайдар иһитиннэрдилэр.

Бу маннык курдук үрдүк бааллаах улахан эстии 2,5 ый анараа өттүгэр, ахсынньы 8 күнүгэр тахса сылдьыбыта. РАН космическай чинчийии институтун уонна РАН Сибиирдээҕи салаатын Күн-Сир физикатын институтун Күн астрономиятын лабораториятын учуонайдара иһитиннэрэллэринэн, эстии Күн арҕааҥҥы кытыытыгар тахсыбыт, онон «былыта» Сиргэ чопчу кэлэрэ биллибэт, халты ааһыан сөп.

Онон магнитнай буурҕалар бу күннэргэ түһүөхтэрэ суоҕа диэн сабаҕалыыллар.

Ол эрээри, бу күннэргэ Күн актыыбынаһа үрдээн,  эстиилэр өссө да тахса туруох кэриҥнээхтэр. Учуонайдар халлаан эттигин күннэтэ кэтээн көрөллөр.