Күнүү суукка тириэрдибит

Үүммүт сыл тохсунньутугар Бүлүү куоракка «Ритм» кафе-барга икки кыргыттар охсуспуттар. Иирсээн төрүөтэ — күнүү.

Кыргыттар улаханнык айдаарсан баран охсуспуттар. Урут киһини кырбааһыҥҥа административнай эппиэтинэскэ тардылла сылдьыбыт кыыс утарсааччытын моойго, искэ  охсуолаабыт.

Суут кэмигэр сууттанааччы буруйун билиммит уонна кэмсиммит.

Суут бириигэбэри таһаарарыгар, сууттанааччы  буруйун толору билиниитин, кэмсиниитин уонна иирсээни быһаччы үөскэппит эмсэҕэлээччи сокуоннайа суох быһыытын учуоттаан,  чэпчэтэр түгэннэринэн аахпыт.

Онон суут буруйдаах дьахтары Арассыыйа Холуобунай кодексатын 116.1 ыстатыйатын 1 чааһынан 200  чаас булгуччулаах үлэҕэ уурбут.

Бириигэбэр сокуоннай күүһүгэр киирэ илик диэн СӨ сууттарын холбоһуктаах пресс-сулууспата иһитиннэрдэ.