Күнүүлээһин уонна арыгы содула ыар буруйу оҥорууга тиэрдибит

Бу сыл ахсынньы 18 күнүгэр  Уус-Маайа улууһун суута Элдьикээн бөһүөлэгин олохтооҕор РФ ХК 111-с ыстатыйатын 2-с чааһын «з» пуунунан  көрүллүбүт буруйу оҥорууга буруйдуур бириигэбэри таһаарда.

Суут быһаарбытынан уонна дьыала матырыйаалларыттан көстөрүнэн, сууттанааччы дьахтар бииргэ олорор киһитин кытта быйыл алтынньы ый ортотугар дьиэлэригэр олорон арыгы испиттэр. Арыгыны бииргэ иһэн баран, эр киһи сынньанабын диэн сыппыт, оттон дьахтар куукунаҕа хаалан, киэһээҥҥи аһылыгы астыы сылдьыбыт. Ити кэмҥэ эр киһи  сатаан утуйбатах уонна дьахтар майгытын-сигилитин төрүөтэ суохха буруйдаан, айдааны тарда сатаабыт. Эр киһи быдьар тылыттан кыыһырбыт дьахтар тыл тылга киирсибэккэ, айдаан кэмигэр быһаҕынан эр киһини куртаҕын алын өттүгэр, хаҥас диэки анньыбыт — ыар эчэйиини оҥорбут. Оҥорбут быһыытын содулуттан куттанан, дьахтар суһал көмөнү ыҥырбыт. Суут дьахтар буруйун билиммитинэн, эмсэҕэлээччигэ көмө оҥорбутунан, урут сууттамматаҕынан, эмсэҕэлээччиттэн бырастыы гыннарбытынан 3 сыл болдьоххо усулуобунайдык көҥүлүн быһарга  уураахтаата. Бириигэбэр сокуоннай күүһүгэр киирэ илик диэн Саха Өрөспүүбүлүкэтин Сууттарын холбоһуктаах пресс-сулууспата суруйар.