Күнүүлээн кэргэнин быһаҕынан бааһырдыбыт, балтын өтүйэлээбит

Хаҥалас оройуонугар 49 саастаах дьахтар холуобунай дьыалаҕа уорбаланар. Кини чугас дьонун эчэппит. Быһылаан кулун тутар 8 күнүгэр тахсыбыт. Иирсээн төрүөтүнэн күнүүлээһин сылтаҕынан буолбут. Бу туһунан Саха сиринээҕи ИДьМ пресс- сулууспата иһитиннэрэр.

Аан дойдутааҕы дьахталларын күнүгэр уорбаланааччы дьахтар, кини кэргэнэ уонна бииргэ төрөөбүт балта арыгы испиттэр. Уорбаланааччы дьахтар итирэн утуйбут, ол кэннэ куухуньаттан тыас-уус иһиллээн уһуктан кэлбит. Итирик эр киһиэхэ уонна балтыгар сыһыаннаан кырыктыйан туран, балтын өтүйэнэн төбөтүгэр охсубут, ону тэҥэ кэргэнин быһаҕынан бааһырдыбыт.

Уорбаланааччыга «Киһи доруобуйатыгар соруйан буортуну оҥоруу» ыстатыйанан холуобунай дьыала тэрийбиттэр. Икки быһылааны биир дьыалаҕа тистилэр.