Дьокуускай, Хаҥалас улууһун Покровскай куоратын оҕо саадыгар өр сылларга методиһынан, кэлин киин куоракка оҕо саадын сэбиэдиссэйинэн үлэлээбит Дарья Романовна Винокурова сайын ахсын дойдутугар, Дьокуускай куоракка сынньанар.
Кини билигин бочуоттаах сынньалаҥар Дубай куоратыгар олорон сиэнин көрөр, оскуолаҕа үөрэнэригэр уруогун толороругар, эбии дьарыктанарыгар тэҥҥэ сылдьан дьарыктанар. Сиэнэ сайыҥҥы сынньалаҥар Москваҕа биир эбээтигэр кэлэн сынньанар, оттон Дарья Романовна хайаан да дойдутугар кэлэн дуоһуйа сынньанар.
Дьүөгэлэригэр, төрөөбүт дойдутугар Уус Майаҕа, Күпкэ тиийэн бииргэ үөрэммиттэрин кытары көрсүһэн, ирэ-хоро кэпсэтэн, айылҕаҕа сылдьан, дуоһуйа сынньанан кэлэр. Быйыл өссө Тааттаҕа тахсан, Манчаары спартакиадатын, түмэллэри көрөн астынан киирдэ.
Күп орто оскуолатын 1980 сыллаахха бүтэрбиттэр, оруобуна Москваҕа олимпиада кэмигэр бүтэрбиттэр. Онон 45 сыллаах историческай кэми бэлиэтээн, үөрэммит оскуолатыгар тиийэн, учууталларын,бииргэ үөрэммит доҕотторун кытары көрсүстэ. Выпускниктар 45 сылларынан кинигэ-альбом таһааттарбыттар. Көрсүһүүлэрин олохтоох Култуура дьиэтигэр химия, биология предметин үөрэппит, оччотооҕу оскуола дириэктэрин В.Е.Романованы, нуучча тылыгар үөрэппит учууталларын Д.С.Васильеваны о.д.а. тэрилтэ үлэһиттэрин ыҥыран, үөрүүлээх линейка оҥордулар. Учууталларыгар сылаас махтал тылларын этэн туран, бэйэлэрин бэлэхтэрин туттардылар.
Маны таһынан элбэх оҕолоох ыалга Анастасия, Дмитрий Бойтуновтарга бастакы кылааска киирэр уоллара Доминик үөрэҕин тэрилин, таҥаһын ыларыгар харчынан көмө оҥордулар.
Билигин баар үөрэппит учууталлара выпусниктара мустан көрсүһүү оҥорбуттарыгар олус махтаннылар, истиҥ кэпсэтии таҕыста. Атласовтар дьиэ кэргэттэригэр түһэн, хонон, мотуордаах оҥочонон айылҕаҕа тахсан олус дуоһуйдулар. Нэһилиэк баһылыга А.Е.Борохина бу тэрээһин суолтата үрдүгүн, үөрэммит оскуолаларыгар сибээстэрин быспаттарыгар махтанна. Нэһилиэккэ саҥа оскуола тутарга былаан баарын иһитиннэрдэ.
Дарья Романовна дьэ ити курдук бииргэ үөрэммит оҕолорун, билигин баар үөрэппит учууталларын көрсөн, төрөөбүт нэһилиэгин айылҕатын сытын ылан, дуоһуйбутун туһунан, нууччалыы санаатын үллэстибитин, эһиэхэ тиэртим. Ыраах итии дойдуга Дубайга тиийэн, дойдуҥ үтүө өйдөбүлэ эйигин арчылаатын.
Марта Николаева
Быйыл сөрүүн сайын буолан, үүнээйи хойукка диэри ас куппакка, улааппакка туран баран, от ыйын ортотуттан…
Киһиэхэ биир тосхойор дьол -- айан уонна саҥаны арыйыы. Саҥаттан саҥа сирдэри, көрбөтөх, ардыгар маннык…
Миигин 1943 сыл сайыныгар Дьокуускай куорат холбоһуктаах байаҥкамаата аармыйаҕа ыҥырбыта. “Ленин” борохуотунан Өлүөнэ эбэбитин өксөйөн…
Тыа хаһаайыстыбатын атын салааларыгар курдук, Саха сирин таба иитэр хаһаайыстыбаларыгар түбүктээх сайыҥҥы күннэр тураллар. Өрөспүүбүлүкэ…
Эрэдээксийэҕэ сурук киирдэ. “Оҕо 17 сааһын туолла да, босуобуйа ылбат. Өскөтүн ыал дохуота кыра буоллаҕына,…
Хаан баттааһына эмискэ тахсар түгэнигэр киһи минньигэһи, туустааҕы, аһыыны аһыыра, арыгы иһэрэ, табах тардара хааччахтардаах.…