Кыра өрүстэргэ уу таһыма түһэн эрэр

Саха сирин түөрт улууһугар — Горнайга, Намҥа, Үөһээ Бүлүүгэ уонна Мэҥэ Хаҥаласка ыаллар тиэргэннэрин уу ылла. Горнай улууһугар уу таһыма түһэр, оттон Мэҥэ Хаҥалас Хочото хонтуруолга тутуллар.

Ол туһунан бүгүн, ыам ыйын 10 күнүгэр, СӨ нэһилиэнньэ олоҕор куттал суох буолуутун хааччыйар кэмитиэт бэрэссэдээтэлин бастакы солбуйааччыта Иннокентий Андросов брифиҥҥэ кэпсээтэ.

«Өрөспүүбүлүкэҕэ сааскы халаан бастакы кэрдииһэ ааһан эрэр. Горнай, Нам, Үөһээ Бүлүү уонна Мэҥэ Хаҥалас улуустарыгар 130 дьиэ тиэргэнин кыратык уу ылла. Горнай улууһун Өрт, Маҥарас уонна Бэс Күөлүн сэлиэнньэлэригэр уу таһыма түһэн эрэр. Бу күннэргэ Мэҥэ Хаҥалас Хочотугар уу таһыма үрдээтэ. Үрэхтэр хааларыттан тахсаннар, 16 олорор дьиэ тиэргэнин уу ылла», — диэн Иннокентий Андросов эттэ.

Салгыы кини бу күнннэргэ Ленскэй, Алдан, Амма уонна Чурапчы оройуоннарыгар муус барара күүтүллэрин эттэ.

«Ыксаллаах быһыы-майгы министиэристибэтин Кылаабынай салалтатын суһал бөлөҕө миэстэтигэр үлэлии көттө. Сааскы халааҥҥа толору бэлэмнээхпит», — диэтэ Иннокентий Михайлович.

Өлүөнэ өрүс мууһа, сабаҕалаһын быһыытынан, Витим бөһүөлэгэр 1,5-2 хонугунан кэлиэхтээх. Аммаҕа өрүс мууһа күүскэ барар, аллара кирбиитэ Мээндигигэ бэлиэтэнэр. Чурапчы улууһун Мындаҕаайытыгар кыра хамсааһыннар бэлиэтэнэллэр. Таатта улууһун Харбалааҕар хамсааһын эмиэ тахсан эрэр.