Кыра нэһилиэктэн биэс уол байыаннай эппэрээссийэҕэ кытта сылдьар

Өлүөхүмэ улууһун Дабаан нэһилиэгэр 380 киһи пропискалааҕыттан бастайааннай олорооччута 201 киһи. Сорохтор Өлүөхүмэҕэ, атын сирдэргэ олороллор. Нэһилиэнньэттэн үгүстэрэ биэнсийэлээхтэр уорнна сааһыра барбыт дьон. Дабаантан байыаннай эпэрээссийэҕэ быстах ыҥырыынан, хантараагынан барбыттарга уонна кинилэр дьиэ кэргэттэригэр көмө туһунан нэһилиэк баһылыга Валентина Александровна Жирохова кэпсээтэ.

— 2022 с. балаҕан ыйыгар быстах ыҥырыы биллэриллээтин кытта биһиги нэһилиэктэн икки уолбут Владимир Г. уонна Борис П. ыҥырыллыбыттара. Олохтоохтор маны олус долгуйа ылыммыттара, хайыахтарай, наада буоллаҕына, бараллар буоллаҕа. Бу уолаттарбыт биһиги нэһилиэкпит хочуолунайын, нэһилиэнньэни уокка оттор маһынан хааччыйан олорбуттара. Маны сэргэ Өлүөхүмэҕэ олорор Константин Ж. ыҥырыллан барбыта. Бу уолаттарбыт кэнниттэн өссө үс биир дойдулаахпыт Михаил С., Кирилл Ж. уонна Никита Н. байыаннай эпэрээссийэҕэ аттаммыттара.

Нэһилиэк олохтоохторо хара маҥнайгыттан Хабаровскайга уонна Владивостокка үөрэххэ сылдьар кэмнэриттэн ыла уолаттар байыаннай таҥас-сап, мал-сал булуналларыгар көмөлөһөн саҕалаабыттара. Владивостокка байыаннай үөрэҕи бара сылдьар Владимир Г. уонна Борис П. 102 тыһыынча солк. хомуллубута, 80-90 тыһыынча солк. Константин Ж. ыытыллыбыта.

Сэтинньигэ «Родник» култуура дьиэтин кэлэктиибин тэрийиитинэн (дириэктэр П.С.Сотникова) атыы-тутуу дьаарбаҥката ыытыллыбыта. Онтон киллэриллибит 30800 солк. үс байыаннай сулууспалаахпыт дьиэ кэргэттэригэр бэриллибитэ. «Үтүө санаа харыйата» аһымал аахсыйанан Саҥа дьылга байыаннайдар оҕолоругар бэлэх оҥоһуллубута.

2022 с. алтынньытыгар Борис П. дьиэ кэргэнигэр уокка оттор маһы хайытан саһааннааһыҥҥа көмө оҥоһуллубута. Онтон сэтинньигэ нэһилиэк эр дьоно түмсэннэр иһэр ууга мууһу ылан, таһан биэриигэ субуотунньуктаабыттара. Нэһилиэк дьокутааттарын быһаарыытынан олохтоох бүддьүөттэн 33900 солк. үбүнэн үс байыаннай сулууспаахпыт дьиэ кэргэнигэр көмө бэриллибитэ.

Олохтоохтор байыаннай эпэрээссийэ бара турар сиригэр баһыылканы ыытарга анаан икки аһымал аахсыйаҕа ас бородууктатынан, барыанньанан, сылаас таҥаһынан кыттыбыттара. Үлэ тэрилтэлэрин салайааччыларын уопсай мунньаҕын быһаарыытынан байыаннайдар дьиэ кэргэттэригэр көмөлөһөргө шеф тэрилтэлэр сыһыарыллыбыттара. Кыайыы бырааһынньыгын иннинэ буойуттар төрөппүттэригэр бородууктанан көмө туттарыллыбыта.

Нэһилиэк олохтоохторо ити курдук тус аадырыстаах көмөнү оҥороллорун таһынан улуустааҕы волонтер Киинигэр көмөлөһөллөр, көҕүлээһинин өйүүллэр. Улуустааҕы анал пуондаҕа нэһилиэнньэбититтэн 72 тыһыынча солк. киллэриллибитэ. Ростов-на-Дону куоракка гуманитарнай көмөҕө үлэлиир волонтер Киинин волонтердарыгар массыынаны ылыыга ити курдук сэмэй кылааппытын киллэрбиппит.

Быстах ыҥырыынан сулууспалыы сылдьар Владимир Г. тепловизор ылынарыгар 76 тыһыынча солк. тиксэриллибитэ. 2023 с. бүддьүөтүгэр инникитин да көмөлөһөргө анаан харчы ууруллубута.