Кыра суудунаны салайыыга дастабырыанньаҕын уларыттын дуо?

Быйыл балаҕан ыйын 1 күнүттэн күүһүгэр киирбит саҥа бэрээдэгинэн, кыра суудунаны салайыыга дастабырыанньа 10 сыллаах болдьоҕо бүтээтин кытта уларытар ирдэнэр диэн ГИМС сулууспатыгар санаттылар.

Дастабырыанньаны уларытарга сайабылыанньаны эрдэттэн – докумуон болдьоҕо бүтүөн биир ый иннинэ биэриэххэ наада. Бу түгэҥҥэ эксээмэн туттарар ирдэниллибэт. Быраабы сөргүтэр бэрээдэк, ол иһигэр быраап быһыллыбытын кэннэ, «Госуслуги» портаал нөҥүө эбэтэр ЫБММ ГИМС салаатыгар сайабылыанньа бэриллиэхтээх. Сүрүн уларыйыынан теоретическай билиилэри биирдэ эрэ тургутан көрүү ыытыллара буолар. «Не зачтено» диэн сыанабылы ылар түгэнигэр, сайабылыанньалаахха судаарыстыбаннай өҥөнү оҥорортон аккаастанар.

Санаттахха, болдьоҕо ааспыт туоһу суругунан кыра суудунаны салайыы иһин 10-тан 15 тыһ. солк. диэри кээмэйдээх административнай ыстараап көрүллэр.