Кырачаан овцебыктары саҥа сиргэ көһөрөллөр

Плейстоценовай паарка уонна Биологическай ресурсалар уонна ураты харыстанар сирдэр дириэксийэлэрин испиэлиистэрин эспэдииссийэтэ Анаабыр улууһун Улахан Бегичев арыытыттан 17 овцебыгы туттулар. Бу туһунан СӨ Биологическай ресурсалар уонна ураты харыстанар сирдэр дириэксийэлэрэ иһиттиннэрэр. 

«Эспэдииссийэҕэ Дириэксийэ үлэһиттэрэ, Аян Иванов уонна Владимир Сивцев, бэтэринээр биэлсэр уонна дьиикэй кыыллары иммобилизациялыыр исписэлиис кытыннылар. Эспэдииссийэни Плейстоценовай паарка дириэктэрэ Никита Зимов салайан илдьэ сырытта. Овцебыктары тутууга ону тэҥэ «АгроВи» ХЭУо бэтэринээр быраастара уонна хамаанда чилиэннэрэ кытыннылар», — диэн СӨ Биологическай ресурсалар уонна ураты харыстанар сирдэр дириэксийэлэрин управлениетын салайааччыта Сергей Егоров иһитиннэрдэ.

Эспэдииссийэ кыттыылаахтара Улахан Бегичев арыытыттан овцебыктары тутан баран, муора суудунатынан Арассыыйа сиригэр-уотугар тиэйии аан бастаан ыытыллыбытын  бэлиэтээтилэр.