Кырачааннарга аналлаах «Мин улааттым» кинигэ күн сирин көрдө

Оҕо биллиилээх суруйааччыта Агния Барто төрөөбүтэ 120 сылын көрсө, Өлүөхүмэ улууһун Кыыллаах нэһилиэгэр кырачааннарга аналлаах “Мин улааттым” кинигэ сүрэхтэниитэ буолан ааста.

Агния Барто тэттик хоһооннорунан үгүс көлүөнэ иитиллэн улааппыта. Күн бүгүҥҥэ диэри аныгы оҕолору иитэр-үөрэтэр суолтата сүппэт. Билиҥҥи курдук ийэ тылы өрө тутар кэмҥэ, сахалыы тылбааһа эмиэ киэҥник сэҥээриллэр.

Кинигэҕэ үлэлэспит дьонтон биирдэстэрэ, Өлүөхүмэ улууһун Кыыллаах нэһилиэгин бибилэтиэкэрэ Раиса Лавернова:

— Кинигэни Агния Барто “Я выросла” хоһоонуттан сиэттэрэн “Мин улааттым” диэн ааттаатыбыт. Дьокуускайга олорор бииргэ төрөөбүт хоһоонньут эдьийбинээн Мария Еремеевна Поскачинаны кытта тылбаастаатыбыт. Тиэхиньиичэскэй өттүн бибилэтиэкэ эдэр үлэһитэ Павлова Мария Ильинична оҥордо.

Оҕолорго кылгастык Агния Барто олоҕун, айар үлэтин сырдата түстүм. 4-11 диэри саастаах барыта 15 оҕо хоһоон аахта. Дьокуускайга олорор бэйэм сиэннэрим эмиэ тэйиччиттэн кытыннылар.

Кыра оҕо уһуннук тулуйан-тэһийэн олорбот. Онон “Бэриниилээх ааҕааччы” кинигэлээх статуэтка кэллиэксийэбиттэн аҕалан аралдьыттым. Хас биирдии кыттыбыт кырачаан кинигэ, махтал сурук, минньигэс тутуурдаах дьиэлээтэ.

Оскуолабыт бибилэтиэкэтигэр, уһуйааҥҥа кинигэбитин бэлэх ууннубут. Кэккэлэһэ олорор нэһилиэхктэрбит уһуйааннарыгар, оскуолаларыгар, улуустааҕы оҕо бибилэтиэкэтигэр эмиэ бэлэхтиир баҕалаахпыт, — диэн кылгастык кэпсиир.