Кырдьаҕас уонна инбэлиит дьон олохторун тупсарар туһугар

Бүгүн, кулун тутар 11 күнүгэр, Т.К. Ядрихинская аатынан Намнааҕы социальнай-геронтологическай киин дьиэтигэр кырдьаҕастар уонна инбэлииттэр дьиэлэригэр олорор дьон олохторун хаачыстыбатын тупсарыыга туһуламмыт аныгы технологиялары туһаныыга анаммыт өрөспүүбүлүкэтээҕи сэминээр-практикум буола турар.

Суолталаах тэрээһин СӨ Үлэ уонна социальнай сайдыы министиэристибэтин сэминээр-мунньаҕын чэрчитинэн ыытыллар. Ол курдук, кулун тутар 11-14 күннэригэр социальнай эйгэ үлэһиттэригэр анаммыт араас тиэмэлээх былаһааккаллар үлэлиэхтэрэ. Нам улууһугар ытык кырдьаҕастарга уонна доруобуйаларынан хааччахтаах дьоҥҥо сөптөөх усулуобуйаны тэрийиигэ, кинилэр олохторун чэпчэтэргэ ыытыллар үлэ туһунан кэпсэтиэхтэрэ.

«Нам улууһа» МТ пресс-сулууспата иһитиннэрбитинэн, туһалаах сэминээргэ өрөспүүбүлүкэ улуустарыттан кэлбит интэринээт-дьиэлэр уонна чааһынай пансионаттар салайааччылара бэйэлэрин уопуттарын атастаһан, саҥа сонун ньымалары үллэстэн элбэҕи билиэхтэрэ-көрүөхтэрэ. Сэминээри СӨ үлэ уонна социальнай сайдыы министрин солбуйааччыта Иннокентий Коротких уонна улуус баһылыгын социальнай боппуруостарга солбуйааччы Егор Протопопов арыйдылар. Тэрээһиҥҥэ Т.К. Ядрихинская аатынан Намнааҕы социальнай-геронтологическай киин үлэһиттэрэ гериатрия эйгэтин, «Передышка» уонна «Күннүк» күнүскү сынньаныы киинин технологияларын уопутун, аҕам саастаах дьону сөптөөхтүк аһатыы, волонтердары кытта үлэ, персонал үлэтин күннээҕи хонтуруолун тиһигин о.д.а. кэпсээтилэр, уопуттарын атастастылар.

Күн иккис аҥаарыгар киин олохтоохторун кытта практическай үлэни көрдөрүөхтэрэ, психологическай тренинг ыытыллыаҕа. Ол кэнниттэн социальнай-геронтологическай киин үлэһиттэрэ Улуу Кыайыы 80 сылынан эҕэрдэ кэнсиэри көрдөрүөхтэрэ.