Кырдьаҕастар дьиэлэригэр 100 сааһы бэлиэтээтилэр

Бүгүн, тохсунньу 25 күнүгэр, В.П. Решетников аатынан өрөспүүбүлүкэтээҕи кырдьаҕастар интэринээт-дьиэлэригэр Саха АССР үтүөлээх учуутала, үлэ, тыыл бэтэрээнэ Учууталлар учууталлара, РСФСР норуотун үөрэҕириитин туйгуна Клавдия Николаевна Слепцова 100 сааһын бэлиэтиир үөрүүлээх тэрээһинэ буолла.

Интэринээт дьиэ дириэктэрэ Наталья Фокина Клавдия Николаевнаҕа Ил Дархан Айсен Николаев илии баттааһыннах уһун үйэни туоһулуур дастыбырыанньаны, бочуоттаах «Үйэ саас» бэлиэни уонна Дьокуускай куорат баһылыга Евгений Григорьев аатыттан 100 тыһ.солк. сэртипикээти туттарда. Үөрүүлээх тэрээһиҥҥэ Клавдия Николаевна соҕотох уола, сиэнэ кэлэн эҕэрдэлээтилэр.

Клавдия Николаевна тохсунньу 25 күнүгэр 1924 сыллаахха Беднодемьяновск Тамбовскай губерниятыгар бааһынай дьиэ кэргэнигэр төрөөбүт. Сэрии аас-туор олоҕун, уустук сылларын эдэркээн санныгар сүкпүтэ. 1948 сыллаахха үөрэҕин бүтэрбит кыыс Саха сирин педагогическай училищетыгар ананан үлэлии кэлбитэ. Саха сиригэр кэлэн үлэлээн-хамсаан, дьиэ-уот тэринэн сааһын тухары бу училищеҕа үлэлээбитэ. Бастакы үлэтин күнүн кини олус иһирэхтик ахтар. Ол курдук, училище оччотооҕу дириэктэрэ Константин Потапов биир массыына оттук мас, куул аҥаара хортуоппуй уонна хаппыыста ыыппытын күн бүгүнүгэр диэри өйдүүр. Саха сиригэр кэлэн кини олоҕун аргыһын Григорий Слепцову көрсөн ыал буолаллар, биир уол оҕолоноллор.

Клавдия Николаевнаҕа кырдьаҕастар интэринээт-дьиэтин кэллэктиибэ олус сэргэх, үрдүк таһымнаах тэрээһини тэрийдилэр. Бу күн интэринээт олохтоохторугар барыларыгар да бэлиэ күн, бырааһынньыктааҕы остуол, туорт, эҕэрдэ тыллар, ырыа-тойук үгүс дьону сэргэхситтэ.

Ульяна Захарова хаартыскаҕа түһэриитэ, видеоҕа устуута.