Кырдьаҕастар интэринээт-дьиэлэрин саҥа куорпуһа тутуллуоҕа

Дьокуускайга В.П. Решетников аатынан Өрөспүүбүлүкэтээҕи кырдьаҕастар, инбэлииттэр интэринээт-дьиэлэрин саҥа куорпуһун сыбаайатын түһэрдилэр. Манна Ил Дархан Айсен Николаев кыттыыны ылбыта.

«Дьиэ кэргэн» национальнай бырайыак «Аҕа көлүөнэ» федеральнай бырайыагынан Саха сиригэр бу эбийиэги тутууга федеральнай бүддьүөттэн  1 млрд 200 мөл. солк. тахса үп  көрүллүбүт.

«Национальнай бырайыактары көҕүлээбит РФ бырабыыталыстыбатыгар уонна бэрэсидьиэн  Владимир Владимирович Путиҥҥа өйөбүллэрин иһин махтанабыт. 2027 сыл бүтүөр диэри манна балтараа миллиард  суумалаах эбийиэк тутуллуоҕа. Ону кытта манна баар эргэ тутууга хапытаалынай өрөмүөнү ыытыахпыт. 14 тыһыынча квадратнай миэтэрэ иэннээх бэртээхэй комплекс тутуллуоҕа. Бу өрүү көрүүгэ-истиигэ наадыйар саастаах дьоҥҥо улахан көмө буолуоҕа», — диэн Айсен Николаев  эттэ.

Күн бүгүн өрөспүүбүлүкэтээҕи кырдьаҕастар уонна инбэлииттэр дьиэлэригэр 310 киһи олорор. Тэрилтэ икки дьиэҕэ баар, биирэ Бекетов уулуссатыгар, иккиһэ Дьокуускайга, онно эбии тутуу тутуллуоҕа.

Эргэ уонна саҥа дьиэлэр икки ардыларыгар сылаас көрүдүөр оҥоһуллуоҕа. Саҥа дьиэ уопсай иэнэ 8931 кв. буолуоҕа.

— Баҕа санаабыт туолуутугар кыттыыны ылар бары дьоҥҥо махтанабыт. Бу бастакы сыбаайаны түһэрии эрэ буолбатах, интэринээт-дьиэ инникитин оҥоруу буолар. Интэринээт-дьиэҕэ билигин 310 киһи олорор, ол иһигэр 9 тыыл бэтэрээнэ уонна 23 сэрии кэмин оҕолоро. Биһиги уһун үйэлээх олохтоохторбутунан олус киэн туттабыт. Биир кырдьаҕаспыт 102 сааһын туолбута. Айсен Сергеевич, өйөбүлгүт иһин, маннык эбийиэктэр тутуллубуттарыгар, аҕа көлүөнэ дьон туһугар кыһаллыбыккытыгар улахан махтал, — диэн пансионат дириэктэрэ Надежда Шомоева махтал тылларын эттэ.

Генеральнай бэдэрээтчитинэн «РФА-Инвест»  инвестиционнай уонна үп хампаанньата (РИК бөлөҕүн чилиэнэ) буолуоҕа.

Сиһилии: https://mintrud.sakha.gov.ru/news/3663