Кырдьаҕастар күннэригэр доруобуйа харыстабылын кэккэ тэрээһиннэрэ

СӨ Доруобуйа харыстабылыгар министиэристибэ уонна Өрөспүүбүлүкэтээҕи 3 №-дээх килиниичэскэй балыыһа Кырдьаҕастар аан дойдутааҕы күннэригэр араас хабааннаах тэрээһиннэри ыыталлар.

Бүгүн Мэҥэ Хаҥалас улууһун Майа сэлиэнньэтигэр көхтөөх уһун үйэлэниигэ өрөспүүбүлүкэтээҕи пуорум ыытылла турар.

Сарсын, алтынньы 1 күнүгэр  11 чаастан “Көхтөөх уһун үйэлэниигэ бииргэ” өрөспүүбүлүкэтээҕи бэстибээл чэрчитинэн “”Көхтөөх уһун үйэлэнии” – кыһалҕалар уонна ону быһаарыы суоллара” төгүрүк остуол буолуоҕа.  Манна доруобуйаҕа аналлаах социальнай хайысхалаах быыстапка тэриллиэҕэ.

Ону сэргэ Өрөспүүбүлүкэтээҕи 3 №-дээх килиниичэскэй балыыһа үлэһиттэрэ алтынньы 1-10 күннэригэр балыыһаҕа кыайан кэлбэт кырдьаҕастарга (60+) дьиэлэригэр тиийиэхтэрэ, “Кыһамньы” аһымал аахсыйаны тэрийиэхтэрэ. “Аһаҕас аан күннэригэр” эмтэнэччилэр исписэлиистэри кытары көрсөн, сүбэ-ама ылыахтара.

Кырдьаҕас көлүөнэ дьоҥҥо гирииби уонна пневмококковай инфекцияны утары быһыыны биэрии тэриллиэҕэ. Ону сэргэ диспансернай чинчийиигэ Аҕа дойду Улуу сэриитин  бэтэрээннэрин барыларын хабыахтара.