Кырдьаҕастар уонна инбэлииттэр байыаннай дьайыыга сиэккэлэри оҥороллор

Соторутааҕыта Кырдьаҕастар уонна инбэлииттэр олорор анал дьиэлэригэр байыаннай дьайыы кыттыылаахтарыгар аналлаах сиэккэлэри өрүүгэ маастар-кылаас ыытылынна.

Бу тэрээһини Анал дьиэ олохтоохторун сэбиэтин чилиэнэ Михаил Шелковников көҕүлээн тэрийдэ. Кини Нэһилиэнньэ социальнай хааччыллыытын кэлим киинин дириэктэрэ Наталья Пахомоваҕа тиийэн, маннык тэрээһини ыытыан баҕарарын биллэрбит. Дириэктэр бу көҕүлээһини тута өйөөбүт.

Маастар-кылааһы “Внуки победителей” волонтердара Шишкина Галина Михайловна, Васильева Галина Владимировна ыыттылар. Сиэккэ каркааһын “Тирэх” киин уонна Нэһилиэнньэ социальнай хааччыллыытын кэлим киинин тэхиньиичэскэй отделын үлэһиттэрэ оҥорбуттар. Бу илим курдукка от-мас өҥнөөх лиэнтэлэри, таҥас лоскуйдарын баайан, саһарга, саптарга аналлаах улахан сиэккэ буолан тахсыахтаах.

Сиэккэни өрүүгэ өссө “Эрчим” киин үлэһиттэрэ эмиэ кытыннылар. Биллэн турар, бу уустук уонна бириэмэни эрэйэр үлэ. Онон Анал дьиэ олохтоохторо күн аайы дьарыктанан, сотору кэминэн  бүтэрэр былааннаахтар. Кинилэр уопсастыбаҕа, байыаннай дьайыыга сылдьар биир дойдулаахтарбытыгар туһаны аҕалалларыттан үөрэллэр.